Futbol üzrə ölkə çempionatının ikinci liqasında 7 tur geridə qalıb.

Hazırda turnir cədvəlində "Baku Sportinq"lə "Göygöl" şərikli liderdi. Növbəti tur bu iki komandanın liderlik uğrunda mübarizəsini izləyəcəyik. Maraqla gözlənilən oyundan əvvəl "Göygöl"ün baş məşqçisi Araz Mansurovun ilk 7 oyun və klubun hədəfləri barədə fikirlərini öyrəndik.

- Mövsümün əvvəlində "Göygöl"ü favoritlərdən biri kimi görənlər az idi. Hazırda turnir cədvəlində ikinci yerdəsiz. Uğurlu qrafiki sona qədər qoruya biləcəksiz?
- Mövsümdən əvvəl biz özümüz də komandamızı favorit kimi görmürdük. Amma geridə qoyduğumuz 7 tur göstərdi ki, biz də yüksək pillələr üçün oynaya bilərik.
- İlk 7 turda yalnız “Cəbrayıl”a məğlub olmusuz. Rəqibə taktiki gedişlərdə uduzduz, yoxsa başqa səbəblər var idi?
- Həmin oyundakı məğlubiyyətin bir neçə səbəbi var. Yeni komanda kimi ilk səfər qarşılaşmamız idi. Bu, həm də Bakıda keçirdiyimiz ilk oyun oldu. Futbolçularımız həyəcanlı olsalar da, yaxşı mübarizə apardılar. Səhvlərdən adi qollar buraxdıq. Məhz bu oyunda buraxdığımız səhvlər bizim üçün böyük təcrübə oldu. Növbəti oyunlara hazırlaşarkən eyni səhvlərə yol verməmək üçün əlimizdən gələni etdik.
- Həmkarlarınız tez-tez stadionların vəziyyətindən şikayətlənirlər. Amma siz ardıcıl qələbələr qazanırsız. Hətta son görüşdəki qələbə əziyyətsiz oldu. Bu qələbələrin sirri nədədi? Digər məşqçilərin narazılıqlarını bəhanə adlandırmaq olar?
- Stadionların vəziyyəti ilə bağlı hansısa problemimiz yoxdu. Amma deməzdim ki, kimsə bundan bəhanə kimi istifadə edir. Ev oyunlarını Göygöldə keçiririk, burdakı şərait bizi tam qane edir. Düşünürəm ki, qələbələrimizin sirri məşqləri yüksək səviyyədə keçirməyimizdədi. Futbolçular məşqlərə ciddi və məsuliyyətli yanaşırlar. Məsuliyyət olan yerdə nəticə də olur. Təbii ki, arxayınlaşmaq lazım deyil, hər şey hələ yeni başlayıb, qarşıda çox oyun var.
- Mövsümdən əvvəl rəhbərlik qarşınıza çempionluq məqsədi qoyub? Ümumiyyətlə, mövsümə hansı hədəflə başlamısız?
- Düzdü, rəhbərliklə hədəflərimiz barəsində danışmışdıq, amma onlar da bizdən belə başlanğıc gözləmirdilər. Cəmi 7 tur geridə qalıb, nəticə çıxarmaq üçün çox tezdi, amma təbii ki, hər komanda kimi, biz də çempion olmaq istəyirik. Ən əsas məqsədimiz isə çempionatı yüksək yerlərdən birində başa vurmaqdı. Rəhbərlikdən yetərincə dəstək görürük. Ümumi götürəndə liqadakı bütün komandalarda maliyyə problemi var. Biz əsasən öz oyunumuza diqqət yetiririk, maliyyə məsələləri bizim üçün arxa plandadı.

ADİL NƏHMƏTLİ