Superliqa təmsilçisi “Antalyaspor”da çıxış edən Naldo Pereyranın oğlundan dünən olduqca üzücü bir xəbər gəldi.

"Football-plus.az" xəbər verir ki, ötən ay Antalyada baş verən maşın qəzasından sonra ağır vəziyyətdə olan “sambaçı”nın 4 yaşlı oğlu Davi Pereyra 40 günlük həyat mübarizəsindən sonra dünyasını dəyişdi. Bu acı xəbəri ictimaiyyətə “Antalyaspor”un rəsmi saytı çatdırdı:

Qeyd edək ki, hadisə sentyabrın 7-si səhər saatlarında Konyaaltı rayonunda iki məhəllənin kəsişməsindəki işıqforda baş vermişdi. Adı açıqlanmayan bir şəxsin idarə etdiyi maşın Naldonun qaynatası Valter Tilattinin idarə etdiyi maşına yandan yüksək sürətlə çırpılmışdı. Zərbənin gücündən Tilattinin idarə etdiyi maşın onunla eyni istiqamətdə hərəkət edən Cüneyt Eslik adlı şəxsin idarə etdiyi motosiklə çırpılmışdı. Naldonun qaynanası Aleksandra Nardi ilə oğlu Davi də həmin an maşında idi. Toqquşmanın gücü futbolçunun qaynanası ilə oğlunu maşından çölə atmışdı. Eləcə də Cüneyt öz motosiklində ciddi xəsarət almışdı. Ətrafdakıların yardımı ilə hadisə yerinə dərhal polis, yanğınsöndürən və ambulans maşınları gəlmişdi. Xəsarət alanlar xəstəxanaya çatdırılmışdı. 4 yaşlı Davinin ürəyi yolda iki dəfə dayansa da, həkimlər həmin vaxt onu həyata qaytara bilmişdilər. Uzun müddət maşında sıxışıb qalan Valter Tilattini isə xüsusi dəmirkəsici alətlərlə ordan çıxarıb xəstəxanaya çatdırmşdılar. O gündən bəri vəziyyətində irəliyə doğru dəyişiklik olmayan Davini xilas etmək mümkün olmadı. Futbolçunun qaynatası ilə qaynanası isə artıq evə buraxılıblar. Onu da bildirək ki, daha öncə “Qremio”, “Bolonya”, “Udineze”, “Xetafe”, “Sportinq”, “Krasnodar”, “Espanyol”da top qovmuş 35 yaşlı Naldo 2020-ci ildən “Antalyaspor”un şərəfini qoruyurdu. O, ötən mövsümü Səudiyyə Ərəbistanı təmsilçisi “Əl-Taavun”da keçirsə də, bu yay ailəsi ilə birlikdə yenidən Türkiyəyə qayıdaraq “Antalyaspor”la müqavilə imzalamışdı.