Arif Əsədov maşını VİP dayanacaqda saxlamaq istəyib, “Sabah” imkan verməyib
“Sabah” - “Araz-Naxçıvan” oyunundan əvvəl yaşanan qeyri-adi hadisə gözdən qaçmadı.
Belə ki, yığmanın baş məşqçisi Canni de Byazinin köməkçisi Arif Əsədov “Bank Respublika Arena”ya buraxılmadı. Daha dəqiq desək, mütəxəssis şəxsi avtomobiliylə oyunu izləməyə gəlmişdi. Lakin təhlükəsizlik xidmətinin əməkdaşları onunla bir neçə dəqiqə söhbət edərək geri yola saldı.
Bu hadisə başqa suallar da doğurur. Ölkənin əsas millisinin məşqçisi premyer-liqa oyununa niyə buraxılmamalıdı? Bəs klubun bu yöndə mövqeyi necədi?
“Sabah”ın mətbuat xidmətinin rəhbəri Elnur Həmidovdan təfsilatı öyrəndik:
“Həmin dayanacaqda yer məhdud olduğuna görə ancaq müvafiq dövlət nömrə nişanları təqdim edilmiş avtomobillərin girişinə icazə verilir. Bu barədə öncədən AFFA-ya məlumat verilmişdi. Stadionun digər dayanacağına isə PFL buraxılışı olan istənilən avtomobil daxil ola bilər. Təşkilatçı qurum olan PFL də mövsümün əvvəlindən məsələdən xəbərdardı. Bu mövzuda qarşılıqlı razılıq əldə olunub. Arif bəy həmin anda klub rəsmilərinə məsələ ilə bağlı məlumat versəydi, problem yerində həllini tapardı”.
Elnur bəyin sözlərindən anlaşılır ki, mütəxəssis kluba bu haqda məlumat vermədən stadionu tərk edib. Görünür, günah məhz Arif Əsədovdadı. Buna baxmayaraq AFFA və PFL-in rəyini öyrənməyi də lazım bildik. AFFA-nın mətbuat katibi Elnur Məmmədli məsələnin tərəflər arasında yoluna qoyulduğunu bildirdi:
“Hadisədən xəbərdarıq. Həm Arif müəllim, həm də AFFA olaraq, biz tərəfdən klubla danışıqlar oldu. Ortada texniki anlaşmazlıq var idi ki, bunu aydınlığa qovuşdurduq. Umu-küsü yoxdu, hər şey qaydasındadı”.
PFL-in media və marketinq direktoru Sənan Abdullayev isə durumu belə izah etdi:
“Bank Respublika Arena”da 2 avtodayanacaq var - P1 və VİP. P1 Peşəkar Futbol Liqası tərəfindən verilmiş mövsümlük buraxılışa malik avtomobillər üçün nəzərdə tutulub. VİP dayanacaq isə klubun ixtiyarındadı və bununla bağlı bütün məsələlər Peşəkar Futbol Liqası ilə razılaşdırılıb. Müvafiq şəxslər də hər şeydən xəbərdardı. Bizim buraxılışını təsdiq etdiyimiz avtomobillər stadion ərazisinə maneəsiz daxil olsa da, VİP əraziyə keçid əvvəlcədən qurumla klub arasında razılaşdırılmalıdı. Arif Əsədov VİP əraziyə daxil olmaq istədiyindən avtomobilinin nömrəsi yekun siyahıda yer almayıb. Məsələni klubla araşdırdıq. Ümid edirik ki, növbəti oyunlarda belə hallar təkrarlanmayacaq və tərəflər təlimatlara uyğun addım atacaq”.
KƏNAN BAHADIR
Digər xəbərlər
