Babək Quliyevin 19 yaşadək futbolçular arasında Avropa çempionatının seçmə mərhələsinin oktyabrın 11-də keçiriləcək Şimali Makedoniya – Polşa qarşılaşmasınında hakim-inspektor olacağı haqda ötən sayımızda məlumat vermişdik.

Yeni statusla UEFA-dan ilk dəfə təyinat alan 49 yaşlı Quliyevlə söhbətləşdik.

- UEFA bayrağı altında keçirilən oyunda ilk dəfə hakim-inspektor olacaqsız. Təəssüratınız maraqlıdı.
- Mayda Fransanın Nitsa şəhərində hakim-inspektorlar üçün kurs təşkil olunmuşdu və mən də seminardan uğurla keçdiyimə görə belə təklif oldu. Bilirsiz ki, 1995-ci ildən bəri UEFA-da ölkəmizdən bir hakim-inspektor olub. O da Asim Xudiyevdi. İkincisi isə mən oldum. Çox gözəl və qürurverici hissdi. Əlbəttə, hər bir keçmiş FİFA referisi istəyər ki, UEFA-nın bayrağı altında təşkil olunan yarışda hakim-inspektor olsun. FİFA referisi olarkən Azərbaycanı necə yaxşı təmsil etmişəmsə, indi də bu adla ölkəmizin bayrağımı uca tutmaq niyyətindəyəm. Təyinat aldığım görüşdəki digər hakimlər Çexiya, Niderland və İslandiyadan olacaq. Fürsətdən istiadə edərək AFFA Hakimlər Komitəsinin sədri Barış Şimşəkə də təşəkkürümü bildirirəm. Biz kursda 30 nəfər idik. Onlardan 10-u xanım idi. Mərhələli şəkildə təyinat verilir.

- Hakim-inspektoru kimi debüt oyununuzda hansı çətinliklərlə üzləşə bilərsiz?
- Birinci oyundu, istər-istəməz çətinliklər olacaq. Lakin mən buna hazıram. Çünki bildiyiniz kimi, ölkə premyer-liqasının oyunlarında da hakim-inspektor oluram. Sadəcə, fərq odu ki, ölkə xaricindədi, ab-hava tam başqadı, hakimləri tanımırsan. Çətinlik bununla bağlı ola bilər. Ancaq bu işin öhdəsindən layiqincə gəlməyə çalışacam.

- Hakim-inspektorda hansı keyfiyyətlər olmalıdı?
- Əvvəlcə dil biliyin güclü olmalıdı. Beynəlxalq dil olan ingiliscə yaxşı danışmalı və başa düşməlisən. Oyunu idarə edən hakimlərin düzünü, səhvini, meydanda tutduğu mövqeyi, fiziki durumunu təhlil edib oyundan sonra onlara çatdırmalısan. Hakim-inspektorluq özü də bir müəllimlikdi. UEFA-da da belə bir qayda var ki, hakim-inspektor mütləq sabiq FİFA referisi olmalıdı.

CAVİD ƏLİYEV