Bir sirrin ardınca: Fərid Məmmədov “Göygöl”ə hansı klubdan keçib?
Daha əvvəl də məlumat verdiyimiz kimi, 2-ci liqanın 5-ci turunun "Göygöl" - "Dinamo" oyununda ev sahiblərinin heyətində meydana çıxan Fərid Məmmədovun qayda pozuntusuna yol verdiyi ilə bağlı iddialar var.
Futbolçu 3-cü turda "Şəmkir"in oyunçusu kimi meydana çıxsa da, cəmi 1 tur sonra "Göygöl"ün heyətində oynayıb, qol da vurub. Mübahisəli vəziyyətlə bağlı "Göygöl"ün rəsmiləri və futbolçunun özü ilə əlaqə saxlamışdıq. Məhz “Futbol+”in müraciətindən sonra "Göygöl" məlumat paylaşmış, lazım gələrsə, rəsmi sənədləri ictimaiyyətə təqdim edəcəyini demişdi. Klubun yeni üzvü Fərid Məmmədov bizə müqavilə ilə "Kəpəz"ə məxsus olduğunu, "Göygöl"ə keçmək üçün məhz bu klubla müqaviləyə xitam verdiyini bildirmişdi. Burda bir sual yaranır: Fərid “Şəmkir”də hansı əsasla oynayıb?
Xatırladaq ki, Fərid 2-ci liqanın 3-cü turunda - "Dinamo" ilə qarşılaşmada "Şəmkir"in əsas heyətində meydana çıxsa da, yarım saatı tamam olan kimi əvəzlənib. Bu münasibətə layiq olmadığını düşünən futbolçu oyundan dərhal sonra müqavilə ilə məxsus olduğu "Kəpəz"ə müraciət edib, azad agent statusu alandan sonra "Göygöl"ün düşərgəsini yollanıb. Bunlar Fəridin dedikləridi. "Göygöl"ün mətbuat xidmətinin rəhbəri Aqşin Ağayevin bizə göndərdiyi sənədlərdən isə görünür ki, sentyabrın 20-də "Şəmkir" futbolçu ilə müqaviləyə qarşılıqlı razılıq əsasında xitam verib. Bu açıqlama Fəridin "Kəpəz"lə bağlı dediklərini şübhə altına salır. Bəs futbolçu niyə "Göygöl"ə keçid məsələsində məhz "Kəpəz"in adını hallandırır? Bu suala cavab tapmaq üçün Gəncə təmsilçisinin mətbuat xidmətinin rəhbəri Azad Mustafayevlə əlaqə saxladıq. O, Fəridin klubla müqaviləsinin mayda bitdiyini, futbolçunun kluba rəsmi bağlılığının olmadığını dedi. Deyəsən, Fərid Məmmədov "Şəmkir"dən necə inciyibsə, yeni kluba keçmək üçün keçmiş komandasının razılığını almağı lazım bilib.
"Şəmkir"in prezidenti Vüsal Məmmədov isə deyir ki, Fərid "Göygöl"ə keçmək istəyini klub rəhbərliyinə çatdırıb və müqaviləyə xitam verilməsi üçün onlarla masaya oturub:
"Fəridlə məşqçi arasında anlaşılmazlıq yaranmışdı. Buna səbəb onun sərgilədiyi performans oldu. Futbolçu "Dinamo" ilə oyunda zəif çıxış etdiyi üçün baş məşqçi onu əvəzləmək qərarına gəldi. Sonradan onun "Göygöl"ə keçidinə heç bir maneə yaratmadıq, qarşılıqlı razılıq əsasında müqaviləyə xitam verdik. Fərid "Göygöl"də göstərdiyi oyunun 40 faizini bizdə göstərsəydi, indi belə olmazdı. Onun "Kəpəz"lə münasibətlərinin hansı səviyyədə olduğunu deyə bilmərəm. Eyni vaxtda iki klubla aktiv müqaviləsi olubsa, bu bizim yox, yüksək qurumların, təşkilatçıların problemidi. Lakin düşünmürəm ki, belə hal mümkün ola".
Sonda yenidən PFL-ə üz tutduq. Qurumun media və marketinq direktoru Sənan Abdullayev məsələnin ciddi araşdırıldığını, qərarın isə ən azı iki həftə sonra bəlli olacağını dedi.
Araşdırma zamanı redaksiyamıza daha bir maraqlı məlumat daxil oldu. Məsələ FİFA üzvü olan bütün milli assosiasiyalarda qeydiyyat bazasının mövcudluğunu nəzərdə tutan “FİFA Connect” layihəsiylə bağlıdı. İddiaya görə, “Göygöl” Fəridin transferini həyata keçirərkən “FİFA Connect” platformasında oyunçunun məxsus olduğu klub “Kəpəz” olub. PFL-in sistemində isə futbolçunun “Şəmkir”lə müqaviləsi olduğu göstərilib. “Şəmkir”in adının mənfi hallandığı ilk məqam bu deyil. Xatırladaq ki, 3-cü tur çərçivəsində keçirilən “Şəmkir” – “Dinamo” oyununda adı rəsmi protokolda olmayan Kərəm Əhmədli meydana çıxdığına görə də bu kluba 0:3 hesablı texniki məğlubiyyət verilmişdi. İstənilən halda, PFL-in rəsmi açıqlamasını gözləməkdə fayda var. Ümid edək ki, bundan sonra bütün suallarımıza ətraflı cavab ala biləcəyik.
ADİL NƏHMƏTLİ
Digər xəbərlər
