“Göygöl”ün transferi qalmaqal yaratdı
Futbol üzrə ölkə çempionatının 2-ci liqasında 5-ci turun “Göygöl” – “Dinamo” oyununda ev sahiblərinin heyətində meydana çıxan Fərid Məmmədovun qayda pozuntusuna yol verdiyi iddia olunur.
Belə ki, futbolçu 3-cü turda “Şəmkir”in oyunçusu kimi meydana çıxsa da, cəmi 1 tur sonra “Göygöl”də “peyda olub”. Futbolçu hətta “Dinamo”nun qapısına yol tapmağı da bacarıb. Bu məsələ bəzi suallar doğurduğundab “Göygöl”ün rəsmiləri və futbolçunun özü ilə əlaqə saxladıq. Maraqlıdı ki, biz müraciət edənə qədər klub problemlə bağlı heç bir tədbir görməmişdi. Yalnız bizim suallarımızdan sonra rəsmi açıqlama hazırlamaq və müqavilə ilə bağlı məlumat vermək ehtiyacı duydular. İkinci liqa komandası olsa belə, “Göygöl”dən daha peşəkar yanaşma gözləməyə dəyər. Klubun öz taleyinə qarşı belə laqeyd yanaşması bizi təəccübləndirdi. İstənilən halda, sonda məsələyə aydınlıq gətirmək məqsədilə rəsmi məlumat vermək ehtiyacı duydular:
“Göygöl” Futbol Klubunun saxtakarlığa yol verməsi ilə bağlı yayılan məlumatlar həqiqəti əks etdirmir. Adı çəkilən futbolçunun - Fərid Məmmədovun “Şəmkir” FK ilə müqaviləsinə 20 sentyabr 2023-cü ildə xitam verilib. Qeyd edək ki, 28 sentyabr 2023-cü il tarixindən 1 iyul 2024-cü il tarixinədək futbolçunun “Göygöl” FK-da oynaması üçün həvəskar futbolçu müqviləsi imzalanıb. Müqavilə imzalanan tarixdən etibarən futbolçu ilk matçına çıxaraq qola imza atıb. Bildirmək istəyirik ki, ehtiyac olduğu təqdirdə oyunçu ilə bağlanan müqavilənin təfərrüatı ictimaiyyətə təqdim olunacaq”.
Hazırda “Göygöl”ün formasını geyən səbəbkarla da əlaqə saxladıq. Fərid haqqında səsləndirilən iddiaların əsassız olduğunu, bütün prosesin rəsmi qaydada həyata keçirildiyini dedi:
“Mən əslində müqavilə ilə “Kəpəz”ə məxsus idim. “Şəmkir”də çıxış edərkən məşqçi ilə bəzi problemlərim oldu. “Dinamo” ilə oyunda cüzi səhvlərə yol verdiyim üçün məni meydandan erkən (31-ci dəqiqədə - red.) çıxardı. Düşünürəm ki, bu münasibətə layiq deyiləm, bu səbəbdən klubdan ayrılmaq qərarına gəldim. “Göygöl”ə keçmək üçün “Kəpəz”ə müraciət etdim. Yalnız bundan sonra rəsmi şəkildə azad agent statusu aldım. Yeni komandama da azad agant kimi qoşulmuşam. Hər şey qaydalar çərçivəsində, rəsmi sənədlər əsasında baş tutub. Əksini iddia edən bütün mənbələr yanılırlar”.
Bu anlaşılmazlığa münasibət öyrənmək üçün PFL-in media və marketinq direktoru Sənan Abdullayevlə əlaqə saxlasaq da, dəqiq məlumat ala bilmədik O, məsələnin araşdırıldığını, tezliklə rəsmi açıqlama veriləcəyini dedi.
ADİL NƏHMƏTLİ
Digər xəbərlər
