“Arsenal” premyer-liqanın son turunda “Tottenhem”ə qalib gələ bilməsə də, “topçular”ın forvardı Bukayo Saka bu oyunu sırf başqa səbəbdən daim xatırlayacaq.

"Football-plus.az" xəbər verir ki, o, premyer-liqada ardıcıl 86-cı oyununu keçirdi ki, bu da “Arsenal” üçün klub rekordudu.

Karyerası boyunca yalnız 28 günü buraxıb
Bu seriyanın əsası 2021-in mayında – “Vest Bromviç”ə qarşı oyunla qoyulub. Onda sol cinah müdafiəçisi mövqeyində oynayan Saka Emil Smit-Rouya məhsuldar ötürmə vermişdi. Həmin gün “Arsenal”ın heyətində indi artıq komandada olmayan Nikolya Pepe ilə Villian da fərqlənmişdi. Saka 2021-in iyununda zədə alsa da, cəmi 5 gün kənarda qaldı və İngiltərə yığmasının oyununu buraxdı. Ümumiyyətlə, Bukayo nadir hallarda sınır: karyerası boyunca bu səbəbdən cəmi 28 günü buraxıb. Sonuncu zədəsinin üstündən artıq iki il keçir. Saka zədə üzündən yalnız “Arsenal”ın iki oyununu buraxıb. Komanda onun yoxluğunda Avropa Liqasında “Molde”ni darmadağın edib (3:0), premyer-liqada isə “Mançester Yunayted”lə oyundan qolsuz bərabərliklə ayrılıb.
Əslində Bukayo hələ avqustun sonunda ardıcıl 83-cü oyuna çıxmaqla “Arsenal”ın bu göstəricidə klub rekordunu yeniləmişdi. O vaxta qədər Pol Mersonun 82 oyunluq seriyası rekord idi. Bu iki futbolçudan sonra isə ardıcıl 78 oyuna çıxan Qael Klişi gəlir.

“Arsenal”ın sabiq xavbeki Merson martda “Sky Sports” üçün yazdığı köşədə Sakanı xüsusi qeyd etmişdi: “O, böyük oyunların taleyini həll etməyə qadirdi. Saka elə oyunçulardan deyil ki, turnir cədvəlinin zirzəmisində olan komanda ilə oyunda het-trik etsin və ya 7:0 bitən oyunda 7-ci qolu vursun. “Arsenal”da hesabı açır və ya bərabərləşdirir, qələbə qollarını vurur, həlledici ötürmələr verir. Onun kimi oyunçuların sayı o qədər də çox deyil”.

Saka cari mövsümdə hamıdan çox oyun keçirib
“Arsenal”da keçirilən oyun sayına görə mühakimə yürütsək, Saka bu mövsüm komandanın ən təcrübəli futbolçusudu. Onun hesabında artıq 184 oyun var. Bukayodan sonrakı pillədə 155 oyunla Məhəmməd Əl-Nenni qərarlaşıb. Misirli isə Mikel Arteta hələ futbol oynayarkən komandada idi. Nketia “topçular”ın formasında 136, Martinelli 135 oyuna çıxıb. İlk “5-liy”i 122 oyunla Qabriel Maqalyaes qapayır.

Sakanın fikirlərinə yer verməyə dəyər: “Mən, sadəcə, “Arsenal”ın heyətində oynamaq istəyirdim. Ağlımda olan yalnız bu idi. Şans qazanandan sonra komandada qalmaq lazım idi, mən də buna çalışırdım. Ətrafda sənə etibar edən adamların olması da lazımdı. Xüsusən də söhbət gənc oyunçudan gedirsə. Oyunun yaxşı və ya pis alına bilər, ancaq məşqçi səni yenidən heyətə qoymağa hazır olanda bu məqam adama böyük inam bəxş edir. “Arsenal”da mənə belə etimad göstərən baş məşqçilər olub, keçirdiyim oyunların sayından da bu görünür”.

Komandanın baş məşqçisi Mikel Arteta isə onun haqqında belə deyir: “Saka yaşına uyğun olmayan şəkildə sabitlik göstərir. Həqiqətən də, belə hallara nadir hallarda rast gəlmək olur. Məndən soruşsaz ki, onun “artırmalı” olduğu cəhətlər varmı, cavab verərdim ki, Bukayo çox şeyi mükəmməlləşdirə bilər. Ona həmişə daha çox şey lazımdı”.