“Record club” rəqiblərin kabusu olacağını iddia edir
Futzal üzrə yüksək liqanın yeni mövsümündə iştirak edəcək komandaların adlarını nəzərinizə çatdırmışdıq. Xatırladaq ki, Futzal Federasiyası İcraiyyə Komitəsinin qərarıyla bu dəfə “Araz-Naxçıvan”, “Neftçi” İK, “Baku Fire”, U-19, “Yasamal-Baku” və “Record club” çempionluq adı uğrunda yarışacaq.
Yay “transfer pəncərəsi”nin vaxtının uzadıldığını da yazmışdıq. Daha dəqiq desək, iştirakçılar heyətə qatdığı oyunçuları əvvəlcədən nəzərdə tutulduğu kimi, sentyabrın 19-na qədər yox, ayın 30-u saat 23.59-dək qeydiyyatdan keçirə bilər. Futzal Federasiyasının mətbuat xidmətinin rəhbəri “Futbol+”ə açıqlamasında səbəbi “Yasamal-Baku” və “Record club”un heyəti formalaşdırmaq üçün vaxt istəmələriylə əlaqələndirmişdi. Çünki adı çəkilən klubların yüksək liqada iştirakı sonradan təsdiqlənib. Xatırlayırsızsa, ötən mövsüm “Record club”un dağılmanın astanasında olduğunu yazmışdıq. Görünür, klub canını qurtara bilib. Araşdırmalar zamanı öyrəndik ki, əvvəlki baş məşqçini iranlı Əli Sabahiağaleh əvəzləyib. “Yasamal-Baku” isə daha öncə yüksək liqada iştirak etmiş “Yasamal” İSK-nin davamçısıdı. Klub Anar İsayevin baş məşqçiliyi altında yarışa böyük hədəflər uğrunda mübarizə aparmaq üçün qoşulub. Bəhs edilən komandalar haqda daha ətraflı məlumat almaq məqsədilə onların baş məşqçilərini aradıq. Mütəxəssislərdən heyətin formalaşdırılması istiqamətində görülən işlər, yeni mövsüm üçün hədəfləri, komandanın son durumu kimi məsələlər haqda bilgi aldıq. Öncə “Record club”un çalışdırıcısı Əli bəyi dinləyək:
“Qarşıdakı mövsümün komanda üçün çox uğurlu olacağını düşünürəm. Azarkeşlər çempionluq uğrunda mübarizə aparan heyətin baxımlı matçlarını izləyəcək. İradə və təmkinlə oyunçuların inkişafı üçün çalışırıq. Yeni ideyalarla çıxış etmək istəyirik. Rəqiblərə meydan oxayan, adı güclülərlə eyni sırada çəkilən “Record club” quracağıq. 2023/24 mövsümü yüksək liqa iştirakçılarının kabusuna çevrilmək üçün yaxşı fürsətdi. Bundan maksimum yararlanacağıq. Klubun uğursuz keçmişi haqda məlumatım var. Lakin bu dəfə tarixin təkrarlanmasına izn verməyəcəyik. Bizdə hər şey əladı. Komandamda ən güclülərin olduğuna əminəm. Azərbaycana futzalına yeni düşüncə və oyun tərzi bəxş edəcəyik”.
“Yasamal-Baku”nun baş məşqçisi Anar İsayevin fikirləri isə belədi:
“Öncəliklə qeyd edim ki, mən məşqçi-oyunçuyam. Hər şeyə sıfırdan başlamışıq. Hələ ki cuzi maddi yardım alırıq. Başqa sponsor axtarışındayıq. Heyətimizin güclü olub-olmaması da məhz bundan asılıdı. Düzdü, indi də pis deyilik. Komandada təcrübəli futzalçılar var. Daha öncə “Neftçi” İK-də, “Araz-Naxçıvan”da çıxış edən, lakin sonradan ayrılan oyunçular da bizimlədi. Hədəfimiz iddialı heyət formalaşdırıb mövsüm sonunda ilk “üçlük”də qərarlaşmaqdı. Rəqiblərimizin güclü olduğunu bilirik. Xüsusilə də “Araz-Naxçıvan”... Qorxmuruq, bütün matçlarda meydana çıxıb xal qazanmaq uğrunda mübarizə aparacağıq. Səhv anlaşılmasın, başqa komandalar da zəif deyil, hər matç çox çətin keçəcək. Sadəcə, “Araz-Naxçıvan”la eyni meydanı bölüşmək belə bizim üçün fəxrdi. Rəqibin kimliyindən asılı olmayaraq qələbə üçün döyüşəcəyik. Heyətdə legioner yoxdu. Hər biri yerli, təcrübəli şəxslərdi. Bir iranlı ilə danışıqlar aparırıq ki, alınıb-alınmaması maliyyə durumumuzdan asılıdı. Bilindiyi kimi, idman növlərində, xüsusilə futbol və futzalda maliyyə böyük rol oynayır. Çalışacağıq ki, ən yaxşısını edib azarkeşləri sevindirək. Özümüzə inanırıq. Həftədə 4 dəfə məşq edirik, fizik, psixoloji, taktiki cəhətdən formalaşmağa, meydana çıxmaq üçün özümüzü hazır hiss etməyə ehtiyacımız var”.
Qeyd edək ki, yüksək liqada yeni mövsümə sentyabrın 26-da start veriləcək. Dairəvi sistemlə keçiriləcək yarış 4 dövrədən ibarət olacaq. Püşkatma mərasimi isə sentyabrın 18-də keçiriləcək.
KƏNAN BAHADIR
Digər xəbərlər
