“Zəngəzur” minifutbol komandası Bolqarıstanda keçirilən Avropa Kubokunda yarımfinala qədər irəliləyə bildi.

Əjdər Əjdərovun yetirmələri 3-cü yer uğrunda oyunda Rumıniya təmsilçisi "Nova Vita Taqru"ya 3:4 hesabıyla məğlub olaraq turniri medalsız başa vurdu. Komandanın turnirdəki çıxışı ilə bağlı baş məşqçi ilə söhbətləşdik.

- Turnirdəki çıxışınızı dəyərləndirərdiz...
- Çox yaxşı oldu. Bu yarışın təşkilatçısı turnirin ən sürpriz komandası kimi bizi kubokla təktif etdi. Burda hər kəs bizdən danışırdı. Çox sevinirəm ki, Zəngəzur adını da tanıtdıq. Artıq hamı bildi ki, bu idman növündə "Zəngəzur" adlı klub da var.

- Turnirdən əvvəl bildirmişdiz ki, hazırlıq müddəti az olub. Bu məqam çıxışınıza təsir etdimi?
- Bəli. Heyətlə bağlı problemlərimiz olduğundan turnirə yaxşı hazırlaşa bilmədik. Yaxşı hazırlaşsaydıq, daha yaxşı nəticə verəcəkdik.

- Heyətlə bağlı problemlər deyəndə konkret nəyi nəzərdə tutursuz?
- Heyətlə bağlı problemimiz bu idi ki, istədiyimiz oyunçuları götürə bilmədik. Bilirsiz ki, ölkəmizdə yetərincə futbolçu var. Sadəcə, onlar öz komandalarında olduqları üçün bizə qoşulmaları alınmadı. Lakin yarımfinala qədər gəlməklə sübut etdik ki, əlimizdə olan oyunçularla bağlı seçimdə səhv etməmişik. Elə futbolçular oldu ki, yarışın sonuna kimi daim meydanda oldu. Bu amil də oyunçuların fiziki cəhətdən yorulmasına gətirib çıxarır.

- Yarımfinala kimi irəlilədiz. Komandanın qarşısına qoyulan hədəf nə idi?
- Yarımfinal oyununda Rumıniya təmsilçisinə qarşı pis oynamadıq. Sadəcə, axırda uşaqlar yorulmuşdu. Bunun da səbəbi oyunların sıx qrafik üzrə keçirilməsidi. 3-cü yer uğrunda oyunda qarşılaşdığımız komanda ötənilki qalib idi. Heyətlərində yığma oyunçuları var idi. Hətta hesabda önə də keçmişdik, sadəcə, yorğunluq bizə mane oldu. Qarşımıza qoyulan hədəf çempionluq idi, lakin qismət bu imiş.

- Qazanılan bu nəticə sizi qane etdimi?
- Təbii ki, yox. Çünki biz bura kuboku qazanmaq üçün gəlmişdik. Lakin uşaqların da əziyyətini yerə vurmaq istəmirəm. Onlar sıx qrafik şəraitində keçən oyunlarda çox əziyyət çəkdilər.

- Heyətinizdə Əfran İsmayılov kimi böyük futboldan gələn oyunçu var idi. Lakin o, komandada qalmayacaq. Əfranla yanaşı, başqa oyunçuları heyətdə saxlamaq üçün danışıq aparacaqsız?
- Əfran İsmayılov kimi bir futbolçunun komandada olması bizim üçün motivasiya idi. Dəvətimizi düşünmədən qəbul etdi və bizə kömək etmək üçün komandaya qoşuldu. Əfranı daha yaxından tanımaq, yoldaş olmaq çox xoş idi. Ona klub rəhbərliyi və öz adımdan təşəkkürümüzü bildiririk. Yeni minifutbol komandası quracağını eşitmişəm. Xeyirli olsun. Gələcək planlarında uğurlar arzulayıram. Heyət məsələsinə gəlincə, Bakıya qayıdandan sonra bu barədə danışacağıq. Çünki biz əvvəlcədən bilmirdik ki, turnirin səviyyəsi bu qədər güclü olar.

- Heyətinizi məhz turnir üçün komplektləşdirmişdiz? Yəni turnirdən sonra komandada ayrılıqlar olacaqmı?
- Bu barədə komandanın rəhbərliyi son qərarını verəcək. Mən burdan bizə dəstək olan minifutbol federasiyasına, yığmanın baş məşqçisi Elşad Quliyevə təşəkkürümü bildirirəm. Daim bizlə əlaqə saxladılar. Həm görüntülü, həm də səsli formada bizə dəstək oldular. Özümüzü vətənimizdəki  kimi hiss elətdirdilər. 


CAVİD ƏLİYEV