Superliqanın debütantı “Samsunspor”a FİFA tərəfindən transfer cəzası verilib.

“Football-plus.az” xəbər verir ki, bu komanda qarşıdakı 2 transfer dönəmində heyətinə yeni oyunçu cəlb edə bilməyəcək. Məsələ burasındadı ki, Samsun təmsilçisi ötən mövsüm 1-ci liqada oynayarkən litvalı Arvidas Novikovasın müqaviləsini birtərəfli qaydada ləğv etmişdi. Litva yığmasının üzvü həm komandada ab-havanı pozmaqda, həm də məşqlərdə var gücü ilə çalışmamaqda günahlandırılmışdı. Bu ilin yanvarında Türkiyədən ayrılan 32 yaşlı yarımmüdafiəçi bu üzdən klubdan FİFA-ya şikayət etmişdi. FİFA bu məsələdə futbolçunun tərəfini tutub. Amma “Samsunspor” məsələni İdman Arbitraj Məhkəməsinə (İAM) daşımaq niyyətindədi. Bir müddət öncə Fransanın aşağı liqa təmsilçisi “Dyunkerk”i satın alan “Samsunspor”un başqanı Yüksəl Yıldırım Türkiyə mətbuatına açıqlamasında həm transfer qadağası, həm də başqa mövzular haqda danışıb: “Bəli, Novikovasa görə FİFA bizə cəza verib. Ümidimizi itirmirik. Haqlı olan tərəf bizik. İAM-a müraciət etmişik. Qalib gəlsək, transfer qadağası aradan götrürüləcək. Amma cəzanın qüvvədə qalmaq ehtimalı da var. Guya 2 dönəm üçün bizə transfer cəzası verilsə, nə olacaq? Biz onsuz da oyunçularla 2-3 illik müqavilələr imzalamışıq. Yaxşı heyətimiz var. Bu heyət yeni transferlər olmadan da bizə 2-3 il fayda verə bilər. “Samsunspor” Samsunun bir nömrəli markasıdı. Ötən tur “İstanbulspor”a qarşı ev oyunumuz yağış üzündən təxirə salındı. Həm yağış yağdıqdan sonra stadionun durumunu, həm də sel fəlakətini gördükdən sonra qəribə hisslər keçirdim. Bunu ilk dəfə burda açıqlayıram. Şəhərimizə və komandamıza yaraşacaq bir stadion tikmək barədə ciddi şəkildə düşünməyə başlamışam. Sizə daha bir etiraf edim. “Nant”da çıxış edən Mussa Sissokonu Türkiyəyə gəlməyə razı salmışdım. “2+1” illik ilkin anlaşma əldə etmişdik. “Nant”ın prezidenti Damien Komolli ilə münasibətlərim çox yaxşıdı. Sonra birdən-birə ortaya “Renn”li Flavien Taitin adı çıxdı. Komollidən bu iki futbolçudan hansının daha güclü olduğunu soruşdum. Mənə birmənalı şəkildə Taiti almağı məsləhət gördü. Biz də bu üzdən bu futbolçuya üstünlük verdik. Pako Alkaser ilə bir aydı danışıq aparırıq. BƏƏ klubunda çıxış edir. Klub bizim təklifimizi qəbul etsə də, Alkaser qəbul etmədi. İndi klubu onu yola gətirməyə çalışır. Biz təklifimizi irəli sürmüşük və onlardan cavab gözləyirik”.

Onu da bildirək ki, yağış üzündən 11-ci dəqiqədə yarımçıq dayandırılan “Samsunspor” – “İstanbulspor” oyunu noyabrın 8-də keçiriləcək.