"Martda qurumun geniş Assambleyası olmuşdu. Növbəti həftələrdə isə başqa iclaslar keçirildi. Bu zaman ərzində Klublar Birliyinin ali rəhbərləri mənimlə söhbətdə namizədliyimi irəli sürməyimi istədi. Sözün düzü, işçi qrupunda olduğumdan əvvəlcə təklifə həvəslə yanaşmamışdım. 2017-ci ildən ECA-nın komitə üzvüyəm, iki il sonra isə sədr müavini oldum. Həmin dövrdə qurduğum münasibətlərin bu yerlərə gəlməyimdə mühüm rolu oldu. Orda müxtəlif layihələr üzərində aktiv fəaliyyət göstərirdik. Olduğum mövqedə çalışmalarla daha yaxından tanış olmaq və mövzuları mənimsəmək imkanım çox idi. Lakin son bir ayda ümumi detallarda müəyyən dəyişikliklər oldu. İcraiyyə Komitəsindən klublara namizədlər üçün formalar göndərildi. UEFA reytinqində 1-55-ci sıralarda qərarlaşmış ölkələr 4 qrupa bölündü. Azərbaycan 4-cü qrupa düşdü. 29-cu pillədə olduğumuzdan məni 29-55-ci sıralarda olan ölkələr namizəd irəli sürməliydi. Yekunda mənə etimad göstərildi və İdarə Heyətinin üzvü seçildim".

"29-55-ci pillələrdə olan ölkələrdən 4 iştirakçıya səs verildi. Mən və HİK (Finlandiya), "Maribor" (Sloveniya) və "Jalgiris" (Litva) təmsilçiləri namizəd olmuşdu. Prosesin gedişində "Maribor"un nümayəndəsi geri çəkildi. İcraiyyə Şurasına üzvlük üçün cəmi iki yer var idi. Allaha şükürlər olsun ki, ən reytinqli klubların səsverməsiylə o iki yerdən birinə mən seçildim. Ümumiyyətlə, 17 yeni üzv sıralara qatıldı. Məşhurlardan "Mançester Siti" (İngiltərə), "Bavariya" (Almaniya), "Bayer-04" (Almaniya), “İnter” (İtaliya), PSJ (Fransa), "Fənərbaxça" (Türkiyə), "Monako" (Fransa) kimi klubların namizədləri də seçkidə qalib gəldi. Təbii ki, belə nəhənglərlə eyni siyahıda olmaq çox qürurverici hissdi. İndiyə qədər Azərbaycan futbolu tarixində qərarvericilik baxımından mühüm əhəmiyyət daşıyan quruma heç kim üzv seçilməmişdi. Qurumda ölkəmizi təmsil edəcəm. Burda özümü doğrultmaq, ölkəmizi yaxşı mənada təbliğ etmək daha mühümdü. Əlimdən gələni etməyə çalışacağam ki, Azərbaycanımızın digər nümayəndələri də Avropaya inteqrasiya edilsin. Düşünürəm ki, başqa vətəndaşlarımız da Avropadakı müxtəlif işçi qrupları və komitələrdə çalışmalıdı. Əlbəttə, məsələ təkcə bundan ibarət deyil. Futbolun istənilən sahəsi üzrə ortaya daha böyük işlər qoymalıyıq. Bu üzdən başqa yerlər uğrunda da mübarizə aparmalıyıq - menecment, marketinq, idarəçilik və sair. Futbol, sadəcə, yaşıl meydanla məhdudlaşmır. Avropada daha çox olsaq və bir-birimizi dəstəkləsək, futbolumuz adına daha yaxşı olacaq".