Son vaxtlar Azərbaycan futbolunda maraqlı hadisələr baş verir. Proseslər həm yaxşılığa, həm də pisə doğru gedir.
Müsbət məqamları, demək olar ki, hər gün saytımız və qəzetimiz vasitəsi ilə diqqətinizə çatdırırıq. Bu yazıda isə ölkə futbolu ilə bağlı qəribə prosesi diqqətinizə çatdıracağıq.
Bildiyiniz kimi, FİFA futbol menecerliyi ilə bağlı qaydalara dəyişiklik edib. Artıq lisenziyası olmayan şəxslər bu işlə məşğul ola bilməyəcək. Dünyann ali futbol qurumu hər ölkə üçün imtahanlar təşkil edir. Bura kimi hər şey qaydasındadı. Amma bir məsələdə Azərbaycan adı varsa, nəsə problem çıxmalıdı. Məsələ nədi?
Martın 14-də AFFA rəsmi saytında belə bir bildiriş paylaşmışdı: “FİFA futbol agenti olmaq istəyənlər üçün məlumat”. Xəbərdə bu işlə məşğul olmaq istəyənlər üçün qeydiyyat linki qoyulmuşdu. Bundan əlavə, imtahanın aprelin 19-da keçiriləcəyi bildirilmişdi. Lakin qeydiyyatdan keçənlər problemlə üzləşmişdi. FİFA-nın rəsmi saytında imtahan yeri kimi Azərbaycan göstərilməmişdi. Həmin dövrdə FİFA lisenziyası almaq istəyənlər başqa ölkələrdən qeydiyyatdan keçməyə məcbur olmuşdular.
İki həftə sonra FİFA yenidən lisenziyalı agent olmaq üçün imtahan keçirməlidi. Yenə də başqa ölkələrin federasiyaları öz vətəndaşları üçün şərait yaradıb. Yəni qeydiyyatdan keçəndə misal üçün Gürcüstanı və Türkiyəni seçmək olur. Amma Azərbaycan seçmini etmək istəyənlərin arzusu ürəyində qalır. Çünki siyahıda ölkəmizin adı yoxdu. Gürcüstan Futbol Federasiyasının rəsmi saytında 45 gün, Türkiyədə isə iki həftə əvvəl imtahanın keçirilmə yeri və qiyməti ilə bağlı məlumat verilib. Lakin AFFA-nın saytında bununla bağlı hansısa informasiya tapmaq mümkün deyil. Bu da lisenziya almaq istəyənlər üçün əlavə çətinlik yaradır. Çünki həm hazırlıq prosesi çətindi, həm də adamlar imtahanın keçirilib-keçirilməyəcəyini bilmir. AFFA-da bu işlərə Nurlan Zeynalzadə nəzarət edir. Lisenziya almaq istəyənlər ona müraciət edərək anlaşılmazlığın nədən qaynaqlandığını soruşanda problemin FİFA-da olduğunu bildirir. Lakin ali futbol qurumu əksini iddia edir. FİFA problemin yerli federasiyadan qaynaqlandığını bildirir. İndi imtahan vermək istəyənlər böyük narahatlıq içindədi. Çünki imtahanın keçirilməsinə iki həftə qalır. Adamlar bu qədər hazırlaşıblar. Lakin imtahanın olmamaq ehtimalı var. Son müraciətdə FİFA şikayətçilərə bildirib ki, problem tezliklə həll olunacaq.
Maraqlıdı ki, Elxan Məmmədov qurumda Azərbaycanı təmsil edir, Sərxan Hacıyev baş katib olmamış federasiyanın Beynəlxalq Əlaqələr şöbəsinin rəhbəri olub. Bəs nə üçün azərbaycanlı menecerlərin bu problemi həllini tapmır? Görünür, ən kiçik məsələlərdə belə dəqiqliyə önəm verən AFFA-dakı dostlar niyə bu problemi həll etmir? Bu məsələ ilə bağlı qarşı tərəfin də fikirlərini işıqlandırmağa hazırıq. Problemi növbəti saylarımızda da nəzarətdə saxlayacağıq.
İLKİN SULTANLI