“Qarabağ”ın rəsmi “feysbuk” səhifəsi “Olimpiya” ilə qarşılaşmadan bir foto paylaşıb.

Leandro Andrade əlini komanda yoldaşı Kevin Medinanın çiyninə qoyub, hər iki futbolçu obyektivə gülümsəyir. Özü də həmin gülüşdə dərin mənanın olduğunu hiss etmək çətin deyil. Oyunun icmalını izləyərkən həmin bu fotoşəkilin 33-cü dəqiqədə çəkildiyini görürük. Medinanın künc bayrağının yanından havalanan topu gözəl baş zərbəsiylə qapıdan keçirməsindən dərhal sonra. Qolun müəllifi komanda yoldaşlarıyla sevincini paylaşır, təbrikləri qəbul edir. Ondan sonra da Leandro əlini Medinanın çiyninə qoyur və onlar həmin anı əbədiləşdirən fotokameranın obyektivinə bu cür gülümsəyirlər. Taleyin qismətidi ki, bu şəklin çəkilməsindən cəmi 11 dəqiqə sonra Leandro da qol müəllifi oldu, “Qarabağ”ın hesabdakı üstünlüyünü bir qədər də artırdı.

Səhər yuxudan oyananda həmin paylaşımı gördüm. Ürəyimdən qəribə bir arzu keçdi. Düşündüm ki, “feysbuk”un yaradıcısı Mark Zukerberq bizə hansısa şəklə birdən-birə “100 ürək” qoymaq imkanı yaratsaydı, mən həmin imkandan o an düşünmədən istifadə edərdim. Medinayla Andradenin həmin şəklinə “100 ürək” birdən qoyardım. Söhbət heç də oyunun nəticəsindən, “Qarabağ”ın Avropa Liqasının qrup mərhələsinə doğru əhəmiyyətli, böyük addım atmasından getmir. Bu şəkildə futbolçuların üzündəki təbəssüm və özünəinam çox böyük qiymətə layiqdi. Onlar Azərbaycan təmsilçisinin ağır yükünü çiyinlərində daşıyır, eniş-yoxuşlu yollarla yürüyür, “Qarabağ”ın adını ucaltmaq üçün bacardıqlarını edirlər. Çəkdikləri əziyyət bəzən xırda bir səhvlə boşa çıxır, yaxud da zəhmətləri hansısa yersiz tənqidlə heçə endirilir. Amma onlar yolurlmurlar, usanmırlar. Bəlkə də, bu keyfiyyət onlara “Qarabağ”ın baş məşqçisi Qurban Qurbanovdan keçib. Qurbanov özü kimi, futbolçularını da mübariz olmağa, yola qətiyyətlə davam etməyin vacibliyinə inandıra bilib.

Qayıdaq Medina ilə Leandronun vurduğu qollarla qələbəyə sevindiyimiz oyuna. “Olimpiya”nın baş məşqçisi Joao Enrike hakimlikdən şikayətlənib. Deyib ki, bolqarıstanlı hakim Georgi Kabakov “Qarabağ”a tərəfkeşlik edib, onun komandasını “sıxıb”. Adamın dəlilinə diqqət yetirin: “Avropada tanınmış komandalar daha çox qorunur”. Heyrətlənməmək mümkün deyil. Görəsən, cənab Enrike “Qarabağ”a qarşı Avropanın yaşıl meydanlarında nə qədər haqsızlıq edildiyindən, neçə-neçə “təmiz” qolumuzun sayılmamasından, bizimkilərə verilən yersiz qırmızı vərəqələrdən xəbərdardımı? Heç inanmıram. Belə çıxır ki, “Olimpiya”nın baş məşqçisi “Qarabağ”ın keçirdiyi oyunları, ordakı hakim səhvlərini incələməyib. Yoxsa belə danışmazdı. Elə Joao Enrikenin komandasıyla oyunda Leandro Andradenin cərimə meydançasında yerdə qaldığı epizod var. Müdafiəçinin “Qarabağ”ın futbolçusunun ayağına müdaxilə etdiyini görmək çətin deyildi. Amma hakimlər fərqli düşündü, cərimə zərbəsi əksinə təyin edildi. Qurban Qurbanov bu epizodu heç xatırlamadı belə.

Joao Enrikenin belə ucuz bəhanələrin arxasına sığınmasını başa düşmək olar. Komandası vacib qarşılaşmada, özü də doğma meydanda Azərbaycan təmsilçisinə məğlub olub. Bununla da Avropa Liqasının qrup mərhələsinə yüksəlmək şansını xeyli azaldıb. Yerli mətbuatın və azarkeşlərin tənqidlərinə hədəf olmamaq üçün nəsə bəhanə etmək lazımdı axı. “Olimpiya”nın baş məşqçisi də bu yola əl atıb, hakim “səhvlərini” qabartmaqla vəziyyətdən çıxmağa çalışır. “Qarabağ”ın “Olimpiya” ilə oyunundan az əvvəl “Astana” – “Partizani” qarşılaşmasını izləyirdim. Orda da hakimlər meydan sahiblərinin aşkar penaltisini vermədilər. Heç VAR hakimləri epizodu baş hakimlə müzakirə etməyə belə ehtiyac duymadılar. Meydan sahiblərinin vurduğu iki qol isə oyundan kənar vəziyyət kimi qiymətləndirildi, qeydə alınmadı. Bu misalı ona görə çəkirəm ki, az qala hər oyunda belə hallarla qarşılaşmaq mümkündü. Görünür, oyun sayı çox olduğuna görə UEFA da eksprement aparır, bəzi hakimlərə məcburiyyətdən təyinat verməli olur. Ümid edək ki, “qara paltarlılar”ın gələcək oyunlardakı səhvi “Qarabağ”dan yan keçəcək, çanaq bizim başımızda sınmayacaq.

Azərbaycan çempionu yoluna davam edir. Oyundan-oyuna artan səviyyə, futbolçuların formaya düşməsi, nöqsanların aradan qaldırılması göz önündədi. Ümid edək ki, bu yol avrokubokların yazına, Avropa Liqasının final mərhələrinə qədər davam edəcək.

AMAL