“Barselona” hələ də maliyyə problemləri ilə mübarizə aparır.

“Football-plus.az” xəbər verir ki, avqustda “Barça Vision” studiyasının səhmlərinin 29,5 faizi satıldı ki, İlkay Gündoğanın transferini qeydiyyatdan keçirmək mümkün olsun. Ancaq klub prezidenti Xuan Laporta bununla kifayətlənmədi və yeni qənaət yolları düşündü. Bu məsələdə yeni yanaşma məşhur “La Masiya”nın imtiyazlarının ixtisarıdı.

Uşaqlar daha məşqə taksi ilə yollanmayacaq

Klubun yetirmələrinin bir hissəsi elə internatda yaşayır, məsələn, Qavi yaxınlarda burdan ayrılıb, ancaq uşaqların əksəri akademiyaya Kataloniyanın müxtəlif regionlarından gəlir. Bu üzdən 1998-ci ildən bəri “Barsa” taksi xidmətindən yararlanırdı. Taksinin ən məşhur müştərilərindən biri Sesk Fabreqasdı, hər gün 65 kilometr yol qət edirdi. Bu səfərlər baha başa gəlirdi, valideynlər pul ödəmək istəmirdi, odu ki, klub özü maşın tutmalı oldu.

Bu xidmət düz 25 il davam etdi. Əksər valideynlər məhz səxavətli servisə görə “Barsa”nı seçirdi. Onlar uşaqlarını maşına qoyur və məşqə göndərirdi, uşaqlar evə də taksi ilə qayıdırdı. “Barsa” bunun üçün bütöv bir taksi parkı saxlayırdı: 30-a yaxın maşın və 40 sürücü klubun sərəncamında idi. Bu xidmətdən gənc oyunçuların 80 faizə yaxını yararlanırdı. Baxmayaraq ki, yetərincə bahalı məşğuliyyət idi. Maşınlar, əməkhaqqı, benzinpulu – bütün bunlar hətta Avropa ölçüləri ilə götürəndə də yetərincə bahadı.

İndi isə klub avtobus sisteminə keçir. Klubun avtobusları uşaqları müəyyən nöqtələrdən götürəcək:

• Jirona: Tordera, Mataro və Badalona;
• Vik: Qranolyers, Parets-del-Valdes və Monkada-i-Reyşax;
• Lerida: İqualada və Abrera;
• Tarraqona: Kalafel, Sitjes və Kasteldefels;
• Manresa: Terrasa və Sant-Kuqat.

Əlbəttə, valideynlər yeni qərardan narazıdı. “Diario Sport” uşağını akademiyadan götürməyə qərar verən atalardan birinin fikirlərinə yer ayırıb: “Taksi futbol məktəbi seçimində əsas amillərdən biri idi. Ancaq indi uşaqları avtobusların keçdiyi nöqtələrə çatdırmaqla bağlı problemlə üzləşirik”.

“Barsa” valideynlərdən marşrutları razılaşdırmağı xahiş edib:

“Dəyişiklik nəticəsində yarana biləcək istənilən çətinliyə görə təəssüflənirik. Yeni əməliyyatlara uyğunlaşmaq baxımından tam əməkdaşlığınıza ümid edirik”.

“Barsa”nın təmsilçiləri iddia edir ki, akademiyada təhsil alanlardan heç biri artıq sentyabrın 6-da start götürəcək yeni dərs ili üçün sənədlərini geri götürməyib. Valideynlər qəzəblənsələr də, uşaqları akademiyaya aparıb-gətirməkdə davam edirlər. Bəlkə də onların nəyisə dəyişmək üçün vaxtı olmayıb, axı klub bu məsələni yeni dərs ilinin başlaması ərəfəsində açıqlayıb.

2-ci komanda üçün nahar ləğv olunub

“Relevo”nun yaydığı xəbərə görə, klub ehtiyat komanda üçün yemək hazırlayan kənar şirkətin xidmətindən də imtina edib. Rafael Markesin çalışdırdığı “Barselona Atletik”in oyunçuları əvvəllər məşqdən sonra səhər və ya nahar yeməyi üçün qala bilərdi. Bu məcburi deyildi, ancaq klub oyunçularına belə xidmət göstərirdi.

Ancaq Laporda bu xidməti də ləğv edib. Klubda belə hesab edirlər ki, bütün bunlar əsaslandırılmayan xərclərdi, axı heç də bütün futbolçular qalmırdı. “Relevo” onu da əlavə edir ki, Markes özü səhər məşqindən sonra oyunçulardan evlərinə dağılışmağı xahiş edib ki, növbəti məşğələlər ərəfəsində yaxşıca dincəlsinlər. “Barsa”nın 2-ci komandasının futbolçuları kluba müqavilə ilə bağlı olan və normal əməkhaqqı alan peşəkarlardı. Onlar bazaya məşqlərə, taktiki məşğələlərə və başqa klub tədbirlərinə qatılmaq üçün baş çəkirlər. Odu ki, naharın təxirə salınmasına tənqid etməyə adamın əli gəlmir. Bunu uzaqbaşı xərclərin optimallaşması kimi qiymətləndirmək olar.
Doğrudanmı, klubun maliyyə durumu belə çətindi?

Hər halda, belə görünür. Xüsusən də La Liqanın məhdudiyyətləri kluba mane olur. “Barça Vision”un səhmlərinin 120 milyona satılmasına, Usman Dembelenin PSJ-yə 50 milyon avroya transfer olunmasına baxmayaraq, “Barsa” hələ də İnyiqo Martineslə Markos Alonsonu qeydiyyatdan keçirə bilməyib. Səhmlərin satışına görə nəzərdə tutulan pulun hələ ki yalnız yarısı ödənilib, Dembelenin satışı isə kluba hardasa 30 milyon qazandıracaq ki, La Liqa da bu məbləğin yalnız 10-12 milyonunu yeni transferlərə xərcləməyə icazə verəcək. İnyaki Penya ilə Kleman Lanqle iştirak ərizəsindən kənarda qalıb, fransalını satmaq istəyirlər. Xavi hələ ki olanlara görə panikaya düşmür: “Bu yayın hansı ssenari üzrə keçəcəyini əvvəldən bilirdik. Hər şey normal olacaq”.
Baş məşqçi belə desə də, heç də hər şey onun xoşuna gəlmir. Məsələn, Laporta Markos Alonsonun satılmasında israr edir, Xavi isə bunun əleyhinədi. Baş məşqçinin fikrincə, Markos Ronald Arauxonu əvəz edə bilər, sadəcə, onun qeydiyyatdan keçməsi əməkhaqqı fonduna 9 milyona başa gələcək. Alonso özü də qalmağı arzulayır. “Barsa” isə Joao Kanselonun baha keçidi ərəfəsində belə riskə getmək istəmir. Bu transfer, demək olar ki, “Mançester Siti” ilə razılaşdırılıb.