“Uşaq və gənclərin fiziki və mənəvi inkişafı” istiqaməti üzrə layihə çərçivəsində yazılarımız davam edir.

Bu dəfəki yazımızda diqqətlərimizi futbola yönəltmişik. Daha doğrusu, premyer-liqada Tovuzu uğurla təmsil edən “Turan Tovuz” klubuna. Müsahibimiz “Turan Tovuz” akademiyasının koordinatoru Rasim Əliyevdi.

- Rasim bəy, artıq ikinci mövsümdü ki, “Turan Tovuz” premyer-liqaya qayıdıb, elitada çıxış edir. Başlayaq ondan ki, bu qayıdış Tovuzun futbol həyatına necə təsir edib? Uşaqların futbola münasibətində bir canlanma yaşanırmı? Futbolla məşğul olmaq istəyənlərin sayında artım varmı?
- Sözsüz ki, “Turan Tovuz”un premyer-liqaya yüksəlməsi, “böyük futbol”un bizim rayona qayıtması Tovuzun futbol həyatının canlanmasına səbəb olub. Mən əminliklə deyərdim ki, bu canlanma təkcə Tovuzda yox, bütövlükdə qərb bölgəsində hiss edilir. Uşaqların futbola marağına, məşqlərə və komandanın oyunlarına gəlməsində gözlə görüləcək, hiss ediləcək dərəcədə artım var. Bilirsiz ki, azyaşlı uşaqlar futbola böyük həvəs göstərir, tanınmış futbolçuları özlərinə kumir seçirlər. Bu gün bizim bölgədə azyaşlıların kumirləri elə öz doğma klublarının futbolçularıdı. Onlar sevə-sevə “Turan Tovuz”un oyunlarına baxır, bu komandanın formasını geyinən futbolçuları özlərinə kumir seçirlər. Mən əminəm ki, bu canlanma Tovuzda futbolun inkişafına da təsirsiz ötüşməyəcək, gələcəkdə Tovuz Azərbaycan futboluna yeni istedadlar bəxş edəcək.

- “Turan Tovuz”un futbol akademiyasında yaradılan şəraitdən danışaq. Bu gün futbolla məşğul olmaq istəyən uşaqlar orda hansı imkanlar yaradılıb? Klubun tərkibində neçə uşaq komandası var? Akademiyada uşaqların qalması və qidalanması üçün şərait varmı?
- Bu gün “Turan Tovuz”un futbol akademiyasında hər bir şərait yaradılıb. Mən əminliklə deyirəm ki, bizim akademiyamız Azərbaycanda olan heç bir akademiyadan geri qalmır. Yəqin ki, siz də eşitmisiz. Uşaq sayını artırmaq üçün stadionumuzun ərazisində yeni bir akademiya binası da tikilir. Zamanla şərait daha da yaxşılaşdırılacaq. Akademiyamızın tərkibində 6 yaşdan 19 yaşa qədər 10 komandamız var. Bundan əlavə 10-14 yaşlar arasında hər qrup üçün yeni bir komanda əlavə etmişik. Eyni zamanda qızlardan ibarət də komanda yaratmışıq. “Turan Tovuz” akademiyasında uşaqlar üçün hər bir şərait yaradılıb, çalışırıq ki, burdakı azyaşlı futbolçularımız tam qayğı ilə əhatə olunsunlar. Bizim akademiyamızda 40-a yaxın uşaq qalır. Onlar həm yüksək səviyyəli qidalanma, həm də istirahət imkanları ilə təmin olunurlar.

- Akademiyanın təhsillə bağlı proqramı necədi? Futbolla məşğul olan uşaqların təhsildən uzaq düşməməsi üçün nə etmək lazımdı?
- Rəhbərliyimiz bu məsələni də daim diqqətdə saxlayır. Həmin uşaqların orta məktəbdə təhsilini davam etdirməsi üçün bütün imkanlar yaradılıb. Onlar yaxınlıqdakı orta məktəbdə təhsil alırlar. Uşaqların sənədlərini məktəblərə təqdim etmişik. Özümüz də məktəbə gedirik, uşaqların necə oxumasıyla maraqlınır. Çünki biz təkcə futbolçu yox, cəmiyyətə yararlı vətəndaş yetişdirməliyik. Hətta rus bölməsində oxuyanlara da şərait yaradılıb, onlar da müvafiq məktəblərə yönəldilib. Çalışırıq ki, heç bir uşaq təhsildən uzaq düşməsin. Biz uşaqlara futbolla yanaşı təhsil almaq üçün imkanlar yaratmalıyıq. Eyni zamanda ingilis dilinin öyrənilməsinə də xüsusi önəm veririk. Rəhbərlik şərait yaradıb, bu ildən məktəbdən əlavə ingilis dili üzrə müəllimlər uşaqlarla ayrıca məşğul olacaq, onlara əlavə olaraq ingilis dili öyrədiləcək. Akademiya ilə müqaviləsi olan hər bir uşağın təhsilinə önəm veririk. Klub olaraq öz öhdəçiliyimiz var. AFFA və UEFA-nın lisenziyalaşdırma qaydalarında da bu qeyd olunub. Heç bir uşağı təhsildən ayırmaq olmaz. Biz də futbolçularımızın təhsil almasında maraqlıyıq.



- Rasim bəy, bəzən valideynlər olur ki, kəndlərdə yaşayır, rayon mərkəzinə övladını gətirə bilmir. Bunun üçün kəndlərdə uşaq komandalarının yaradılması planlaşdırılırmı?
- Dediyiniz məqam bizim də diqqətimizdədi. Artıq Tovuzun iki kəndində xüsusi qruplar yaratmışıq. Qovlar və Qaraxanlı kəndlərində bu qruplarımız fəaliyyət göstərəcək. Bu kəndləri də elə seçmişik ki, ərazi olaraq beş-altı kəndi əhatə edə bilək. O kəndlərdə yaşayan uşaqlar həmin qruplarda futbolla məşğul olacaqlar. Bu uşaqların arasında fərqlənənləri isə akademiyamıza cəlb edəcəyik. Bildiyiniz kimi, bu yay əsas komandamız Türkiyəyə, Ankaranın Qızılcahamam bölgəsində təlim-məşq toplanışı keçirdi. Mənimlə yanaşı məşqçimiz Seymur Tağıyev də əsas komandanın düşərgəsində idik. Orda “Gənclərbirliyi”nin düşərgəsində də olduq. Klubumuzun rəsmilərindən olan Səməd Nəsibov da bizimlə idi. Ankara təmsilçisinin akademiyasının rəhbəri Seçkin Topçu ilə də görüşdük. Bir həftədən artıq onların akademiyasında olduq, təcrübə mübadiləsi apardıq. Gələcək fəaliyyətimizdə də hər bir nüansı nəzərə almağa çalışacağıq.

- Az öncə qeyd etdiz ki, qadın komandası da yaratmısız. Son illərdə qadın futbolu ilə bağlı FİFA və AFFA tərəfindən müxtəlif proqramlar həyata keçirilir. Belə anlaşılır ki, “Turan Tovuz”da bu yöndə müəyyən addımların atılmasına başlanılıb...
- Bəli, artıq qadın futbol komandası yaratmışıq. Zamanla bu sahəyə də diqqəti artıracayıq. Oğlanlarla yanaşı qızlarımız da futbolla məşğul olmaq, öz bacarıqlarını göstərmək imkanı qazanacaqlar.

İLKİN SULTANLI



Yazı Azərbaycan Respublikası Medianın İnkişafı Agentliyinin maliyyə dəstəyi ilə, “Uşaq və gənclərin fiziki və mənəvi inkişafı” istiqaməti üzrə hazırlanıb.