Roberto Mançini gözlənilməz qərar verib. O, İtaliya yığmasının baş məşqçi vəzifəsindən istefaya yollanıb.

"Football-plus.az" xəbər verir ki, İtaliya Futbol Federasiyasının (İFF) məlumatında Mançininin bazar günü axşam saatlarında milli komandanın baş məşqçi vəzifəsini tərk etmək istədiyi bildirilib. İFF onun xahişini təmin edib. İtaliya yığması tezliklə AÇ-2024-ün seçmə mərhələsində Şimali Makedoniya (9 sentyabr) və Ukrayna (12 sentyabr) ilə qarşılaşacaq. Bu səbəbdən İFF yaxın günlərdə yeni baş məşqçinin adını açıqlayacaq. Milli komanda seçmə turnirdə 2 oyuna topladığı 3 xalla C qrupunda 3-cü yerdədi. 1-ci yeri İngiltərə (4 oyuna 12 xal), 2-ci yeri isə Ukrayna (3 oyuna 6 xal) yığması tutur.
Mançini İtaliya millisinin baş məşqçi vəzifəsinə 2018-ci ilin mayında təyinat almışdı. Komanda onun rəhbərliyi altında AÇ-2020-nin qalibi olmuş və iki dəfə UEFA Millətlər Liqasının bürünc mükafatını qazanmışdı.

Artıq Mançininin postunu niyə tərk etdiyi məlum olub. “Sky Sport Italia”nın yaydığı xəbərə görə, 58 yaşlı mütəxəssis yığmadan ölkə futbol federasiyasının prezidenti Qabriele Qravina ilə fikir ayrılığı səbəbindən ayrılıb. O, öz köməkçiləri ilə işləmək imkanının olmamasından narazı qalıb. Mançininin karyerasını Səudiyyə Ərəbistanında davam etdirə biləcəyi iddia olunur. “La Gazzetta dello Sport”un məlumatına görə, onu İtaliya millisində əvəzləməyə əsas namizədlər Antonio Konte və Luçano Spallettidi. Yeri gəlmişkən, Konte artıq 2014-16-cı illərdə yığmanı çalışdırıb. O, son mövsümün gedişində “Tottenhem”dən ayrılandan sonra işsizdi. Spalletti isə ötən mövsüm “Napoli”ni A seriyasında çempionluğa daşıyandan sonra komandanı tərk edib.