“Qarabağ”ın baş məşqçisi Qurban Qurbanov “Turan Tovuz”la oyundan sonra keçirilən mətbuat konfransında havanın isti olmasına və oyunun erkən saatda başlamasına toxunub: “Futbolçular əziyyət çəkdi. Bəlkə biz də PFL-ə müraciət etsəydik, “yox” deməzdilər. Sadəcə, digər oyunun təxirə salındığı iki günün içində bilindi. Ola bilər ki, heç birimizin ağlına gəlmədi, bu barədə düşünmədik”. Bu sitat əbəs yerə diqqətimi çəkməyib. Qurban bəyin sözlərində ictimaiyyətə böyük mesaj var. Bəlkə heç özü də buna fikir verməyib.

Bizimkilər “Qarabağ”ı yeri gəldi-gəlmədi ittiham etməyi xoşlayırlar. “Sabah”ın oyununun təxirə salındığı həftədə “Qarabağ” heç “Turan Tovuz”la qarşılaşmanın saatının dəyişdirilməsiylə bağlı PFL-ə müraciət etməyi belə lazım bilməyib. Qurban bəyin sözlərindən belə anlaşılır ki, komandanın düşərgəsində heç bu barədə düşünən də olmayıb.

“Köhlən atlar” öz yoluyla irəliləyir. Enişli-yoxuşlu bu yolda daim eyni sürətlə getmək mümkün olmur, hərdən təntiyirsən, yorğunluqdan ayağın da büdrəyir. Amma davam edirsən. “Qarabağ” öz işindədi. Diqqət yetirdim, “Sabah”ın “Sumqayıt”la oyunun təxirə salınması elə də ciddi müzakirə doğurmadı. Doğrusu da elə budu. Biz hələ böyük futbol ölkəsi deyilik. Stadionlarımızın tribunaları avrokubok oyunlarında dolur, xalqımız premyer-liqamızın qarşılaşmalarına televizordan minnətlə baxır. Belə olan halda bizimkilərdən Avropanın qərbində olduğu kimi peşəkarlıq tələb etmək də düzgün deyil. Klublarımız bərabərsəviyyəli iki heyət saxlamaq gücündə deyillər ki, birindən avrokuboklarda, digərindən isə yerli çempionatda istifadə etsinlər. Heç buna ehtiyac da yoxdu. Mövsümün əvvəlində bir qədər çətinlik olur, ondan sonra da daşlar yavaş-yavaş yerinə oturur.

Hə, onu deyirdim ki, “Sabah”ın oyunun təxirə salınması ciddi ajiotaj doğurmadı. Hələ PFL-ə qınaqlar da səslənirdi ki, nə üçün “Neftçi”nin Gəncəyə səfəri və “Səbail”lə oyunu təxirə salınmayıb. Sonradan məlum oldu ki, “ağ-qaralar”ın baş məşqçisi Adrian Mutu bunu istəməyibmiş. İstəsəydi, “Neftçi” Peşəkar Futbol Liqasına müraciət ünvanlacaqdı. Heç şübhə etmirəm ki, bakılılara da güzəşt ediləcəkdi. Vay o günə ki, “Qarabağ” “Turan Tovuz”la oyunun iki saat geri çəkilməsi üçün səsini çıxaraydı. Hay-küy, vay-şüvən ondan sonra başlayacaqdı. Deyəcəkdilər ki, “nə var o Finlandiya komandasını keçməyə? “Qarabağ” nə üçün “Turan Tovuz”la oyunu axşam saatına saldırır? Futbolçuların borcudu ki, havanın necə olmasına baxmasınlar, meydana çıxıb topun arxasında qaçsınlar”. Mən hələ sosial şəbəkələrdə bir azarkeşin yazdığı şərhə xeyli güldüm. Dəyərli həmvətənlərimizdən biri daha uzağa gedib, “müdrik nəticə”yə gəlmişdi. İddia edirdi ki, “Qarabağ” rəhbərliyi “işıqpulu” verməməkdən ötrü oyunu günün işıqlı vaxtına saldırıb. Belə təfəkkürə, belə mülahizə və təhlil qabiliyyətinə nə deyəsən?!

İsti havaya baxmayaraq, “Qarabağ” meydana çıxdı və “Turan Tovuz”u üç cavabsız qolla məğlub etdi. Bu həmin “Turan Tovuz”du ki, ilk turda “Araz Naxçıvan”ın daşını daş üstə qoymamış, elə eyni sayda cavabsız qolu onların qapısına vurmuşdu. Müqayisəni tamamlamaq üçün “Araz Naxçıvan”ın da bu tur “Qəbələ”ni 2:0 məğlub etdiyini xatırlayaq. Deməli, Tovuz təmsilçisinin premyer-liqanın debütantını asanlıqla məğlub etdiyi düşünmək yanlış olar. Turlar irəliləyəcək, elə həmin rəqiblər bir-birini məğlub edə-edə yarışacaqlar, turları yola verəcəklər. “Qarabağ” isə öz missiyasını yerinə yetirməklə məşğul olacaq. Həm premyer-liqanın ən güclüsü adını özündə saxlamaq, həm də Azərbaycan futbolunun imicini Avropanın yaşıl meydanlarında yüksəltmək üçün mübarizə aparacaq. Ümid edirəm ki, bu avrokubok mövsümündə “Sabah” çətin sınaqda “Qarabağ”ı tək qoymayacaq, Konfrans Liqasının qrupuna yüksəlməyi bacaracaq.

Bütün bunlar yaxın gələcəyin işidi. Bu gün isə “Qarabağ” yavaş-yavaş formasını bərpa etməkdə, relsə düşməkdədi. “Köhlən atlar” yürüməyə öyrəncəli olduğu cığıra qədəmlərini qoyub. Ağdam təmsilçisinin “Turan Tovuz”u 3:0 hesabıyla məğlub etməsində hamı üçün bir mesaj var idi. Əzəmətli komanda, onun peşəkar idarəçiləri və bacarıqlı baş məşqçisi yerindədi. Müvəqqəti eniş görüntüsü heç kimi aldatmasın. “Qarabağ”ın bu mesajını qəbul etmək, ona ciddi yanaşmaq lazımdı. Qurban Qurbanovun çalışdırdığı komanda yenə də çempionluğa və Azərbaycanı avrokubokların qrup mərhələsində təmsil etməyə ən real namizəddi.

AMAL