“Neftçi” – “Jelezniçar” oyunundan bir saat əvvəl başlayan “Sabah” – RFŞ qarşılaşmasında “Bank Respublika Arena”nın tribunalarındakı mənhus durumu, boşluqları və seyrəklikləri gördüzmü? Baxmayaraq ki, ortada “Sabah” rəhbərliyinin satılan biletlərin hər birindən 1 manatın Qarabağ Dirçəliş Fonduna ianə olunması ilə bağlı nəcib təşəbbüsü var idi, baxmayaraq ki, oyun başlayandan sonra da azarkeşlər tribunalara buraxılırdı.

5 milyon adamın yaşadığı deyilən Bakıdan və ətrafından həmin gün keçirilən iki oyuna cəmi 14730 azarkeş gəlmişdi. Hər şey planlaşdırılan kimi getsə, inanın ki, avqustun 10-da bundan da betər mənzərə ilə üzləşəcəyik.

Əslində “Qarabağ”la “Sabah”la oyununun startının eyni saata salınması ilə işlər yenə korlanmışdı. UEFA “Beşiktaş”ı da həmin gün Bakıya göndərməklə daha qəliz və çıxılmaz durum yaratdı, azərbaycanlı azarkeşləri barmağına doladı. 30 minlik “Bəhramov”u da nəzərə alsaq, həmin gün 50 min azarkeşin stadionları doldurmasını gözləyirik. Daha dəqiqi, umuruq, bunu gözləməyə dəyməz.

Bu məsələdə mənim üçün maraqlı olan sual çoxdu. Ancaq hələlik bundan başlayaq: “Fənərbaxça”ya görə “Beşiktaş”ı Bakıya göndərməyə qərar verən UEFA həmin gün Azərbaycan paytaxtında iki oyunun keçiriləcəyindən xəbərdar deyildi? Və ya bu məqamı aydınlaşdırmaq üçün AFFA ilə məsləhətləşməyə ehtiyac duyubmu? Ümumiyyətlə, qitə və milli futbol qurumu arasında belə kommunikativ yaxınlıq varmı?

Yuxarıdakı sualların necə cavablanacağından asılı olmayaraq, ortada bir gerçək var ki, AFFA-nın bu üç oyundan birini avqustun 9-da keçirmək yönündə danışıqları uğursuz bitib və indi avqustun 10-u ilə bağlı manevr etməkdən başqa seçimimiz yoxdu. O dəqiqə deyəcəksiz ki, nə manevr, başın xarab olub? Yox, başım xarab olmayıb, sadəcə, start saatı ilə “oynamağı” nəzərdə tuturam. Xatırlayırsizsa, iyulun 27-də keçirilən “Jelezniçar” – “Neftçi” oyunu 22.30-da başlamalıydı, amma UEFA bosniyalılara güzəşt etdi, start fiti yarım saat gec səsləndi. İndi AFFA da qitə futbol qurumuna eyni istəklə müraciət edə bilər.

Sadəcə, “Qarabağ”, “Sabah”, “Neftçi” ilə da danışandan sonra münasib yol tapmaq olar. Ən azı “Qarabağ”la “Neftçi”nin oyunu arasında iki saatlıq “dəhliz açmaq” lazımdı ki, azarkeşlər bir oyundan çıxandan sonra digərinə yollana bilsin. Bəli, gecikmə olacaq, düzünə qalsa, belə duruma görə ən azı neytral azarkeşlər oyunlara evdən – TV-dən baxmağı üstün tutacaq. Bununla belə, vəziyyətdən çıxmaq üçün hansısa yol varsa, onu tapmaq və həmin yol ilə getmək lazımdı. Vaxtla bağlı seçim edəndən sonra metronun iş qrafikini də dəyişmək olar.

Bir sözlə, vaxt az, seçim imkanımız məhduddu. Amma mənə elə gəlir ki, bütün hallarda çıxış yolları var. Yetər ki istək olsun! Bir atalar sözündə deyildiyi kimi: çobanın könlü olsa, təkədən pendir tutar!

ORXAN