Son günlərdə Anadolu klubları da transferdə xeyli fəallaşıb. Məsələn, debütant “Samsunspor” heyətini diqqətçəkən oyunçularla gücləndirməkdə davam edir. 11 ildən sonra elitaya qayıdan Samsun təmsilçisi “Qalatasaray”dan artıq 3 futbolçu – qapıçı Okan Kocuku, eləcə də Taylan Antalyalı ilə Əmrə Kılınçı transfer edib.

"Football-plus.az" xəbər verir ki, “ağ-qırmızılar” qalmaqallı niderlandlı futbolçu Məhəmməd İhatterenlə də dördillik anlaşma əldə edib. PSV-nin yetirməsi olan 21 yaşlı vinger 2021-in yayında 1,9 milyon avroya “Yuventus”a transfer olunmaqla diqqəti çəkmişdi. Amma sonradan yoxa çıxan, icarəyə verildiyi “Sampdoriya”da oynamaq istəməyən, depressiyaya düşən, karyerasını bitirmək istəyən futbolçu 2022-nin yanvarında “Ayaks”a keçdi. Burda da möhkəmlənə bilməyən, ötən il müqaviləsi ləğv olunan və 2023-də bir dəfə də rəsmi oyuna çıxmayan İhatteren Türkiyədə karyerasını yenidən qurmağa çalışacaq.

Transferləriylə diqqəti çəkən daha bir klub “Konyaspor”du. “Ağ-yaşıllar” 5 oyunçu ilə müqavilə imzalayıb. Söhbət Aleksandru Çikıldau, Morqan Şnayderlin, Yunus Mallı, Marlos Moreno və fransalı qapıçı Pol Benrardonidən gedir. Çikıldau futbolsevərlərə “Qalatasaray”dakı çıxışı ilə tanışdı. O, birilliyə icarəyə götürülüb. Uuzn illər Almaniyada top qovmuş Mallı da kifayət qədər tanınmış futbolçudu. Şnayderlin isə dünya səviyyəsində tanınan oyunçulardan biridi. Zarafat deyil, “Mançester Yunayted” onu 2015-də 25 milyon funt sterlinqə transfer etmişdi. “Yunayted”dən sonra “Everton”, “Nitsa” və sonda “Sidney Uonderers”də forma geyən 33 yaşlı yarımmüdafiəçi Fransa yığmasının heyətində də 15 oyun keçirib. Şnayderlinlə ikiillik müqavilə imzalanıb.

“Antalyaspor” isə daha çox son satışı ilə diqqəti cəlb edib. Uzun müddət İstanbul nəhənglərinin hədəfində olan ABŞ yığmasının üzvü Haci Rayt 9 milyon avroya çempionşip təmsilçisi “Koventri”yə satılıb! Müqavilədə əlavə 2 milyon avroluq bonuslar da mövcuddu. Bu, klub tarixinin ən bahalı satışıdı. Əvvəlki rekord ötən yay 4 milyon avroya “Hall Siti”yə keçən Doğukan Sinikə məxsus idi. Maraq üçün bildirək ki, Antalya təmsilçisi Raytı 2021-in yayında “Sonneryuske”dən 1,8 milyon avroya transfer etmişdi. Son mundialda ABŞ-ın heyətində Niderlandın qapısına yol tapmağa müvəffəq olan Rayt “Antalyaspor”da keçirdiyi 2 mövsüm ərzində 64 oyunda 31 qol, 5 məhsuldar ötürməlik performans sərgiləyib.