"RFŞ avqustun 1-i, səhər saat 05.35-də Bakıda olacaq. “Hyatt Regency” otelində məskunlaşacaqlar. Latviyadan azarkeş və media nümayəndələrinin gəlib-gəlməyəcəyi dəqiqləşməyib. Qarşı tərəfdən də bizə bu haqda məlumat verilməyib. Hazırda 1000-dən çox bilet satılıb. Bu sayın qarşıdakı günlərdə daha da artacağı şübhə doğurmur. Çünki hələ ki Masazırda satış başlamayıb. Bu proses bu gündən başlayacaq".

"Avrokubokda debüt etsək də, uğurlu start götürdük. Rəqibimiz yetərincə güclü idi. Buna rəğmən, konsentrasiyanı qoruya bildik. 18-20 dəqiqə daha yaxşı oynadıq, təşəbbüsü ələ aldıq. Rəqibə göz açmağa imkan vermədik. Tirdən qayıdan bir zərbəmiz də oldu. Amma sevindirici haldı ki, 2-ci qol vəziyyətində son nöqtəni qoyduq. Sonra RFŞ yenə təşəbbüsü ələ aldı, qapımız qarşısında qol imkanları yaratdı. Amma yaxşı qapanaraq onların hücumlarını boğduq. Fasilədən sonra da rəqib təzyiqə başladı. Sevindirici haldı ki, onlar şansları boşa verdilər, müdafiəmiz də uğurla işinin öhtəsindən gəldi. Üstəlik əks-hücumda 2-ci qolu vurduq. Amma latviyalılar təslim olmaq barədə düşünmürdülər. Onların hava ötürmələri daha təhlükəli alınırdı. Hakimin final fitinə qədər qol axtarışında oldular. Amma Yusif İmanov başda olmaqla bütün komanda hesabın dəyişməsinə imkan vermədi. Yaxşı oynadıq və layiqli qələbə qazandıq. Buna rəğmən, indidən arxayınlaşmaq olmaz. Hələ Bakıda cavab oyunu var. Bütün gücümüzü səfərbər etməliyik ki, doğma meydanda da yaxşı çıxış edib, növbəti mərhələyə keçək. Bizə dəstək olan, inanan hamıya dərin təşəkkürümü bildirirəm".

"Bəli, heç kimə sirr deyil ki, Latviyaya gedərkən problem yaşadıq. Məşqçilər korpusumuzdakı rusiyalı mütəxəssislərə, o cümlədən Murad Musayevə giriş qadağası qoyulmuşdu. Lakin ölkəyə daxil olmağın alternativini tapdıq. Avstriyaya gedib, ordan yenidən Riqaya uçduq. Problemlər həmişə olur. Onlardan heç kim "sığortalanmayıb". Amma çalışmaq lazımdı ki, ya onlardan qaçasan, ya da həll yolunu tapasan. Sevinirik ki, problemi həll edə bildik".