Braziliyalı futbolçu Mateus Saldanya srağagün “Neftçi”dən kənarlaşdırılıb. Bakı klubu bununla bağlı bəyanat yayıb:

“Neftçi”nin 2024-cü ilin yanvarınadək icarə müqaviləsi olan futbolçusu Mateus Saldanya son günlərdə rəhbərliyə Serbiyanın “Partizan” klubundan maliyyə cəhətdən çox yaxşı təklifin olduğunu bildirib. Son müsahibələrində “Neftçi” ilə müqaviləsinin olduğunu və sonadək komandada qalacağını bildirən futbolçu bu təklifdən sonra klub rəhbərliyindən getməsi üçün icazə istəyib. Lakin klub rəhbərliyi indiki vəziyyətdə, yəni mövsümün əvvəlində, Konfrans Liqasının oyunlarına bir neçə gün qalmış onu komandadan buraxmaq istəmədiyini dəfələrlə nəzərinə çatdırıb. Bütün bu xəbərdarlıqlara baxmayaraq, Mateus Saldanya son günlərdə müxtəlif səbəblər göstərməklə kollektivlə birlikdə məşqlərdə iştirak etməkdən yayınıb, iyulun 24-də keçirilən məşqdə isə icazə almadan iştirak etməyib. Rəhbərlik futbolçunun belə hərəkətləri ilə bağlı həm onu, həm də menecerini rəsmi qaydada məlumatlandırıb. Bildirilib ki, “Neftçi” kimliyindən asılı olmayaraq maddiyyatı hər şeydən üstün tutan, onun rənglərinə bağlı olmayan, forma üçün mübarizə aparmağa hazır olmayan heç bir kəsi heyətində məcburi saxlamaz. Buna görə də braziliyalı futbolçunun komandadan xaric olunması haqqında qərar verilib. Ürəyi “Neftçi” ilə olmayanın özü də “Neftçi”də olmamalıdı. Qayğısı yalnız maddiyyat olan futbolçuya “Neftçi” kimi klubda yer yoxdu. Qeyd etməliyik ki, proses dövründə “Partizan” klubu yazılmış və yazılmamış qaydalar çərçivəsində davranıb. Dostluq münasibətlərimiz olan Belqrad təmsilçisinə heç bir iradımız yoxdu. Azarkeşlərimizi əmin etmək istəyirik ki, Konfrans Liqasında keçiriləcək ilk oyunumuza bir neçə gün qalmış Saldanyanın komandamızı çətin vəziyyətdə qoymasına baxmayaraq, klubun rəhbərliyi və məşqçilər korpusu vəziyyətdən ən məqbul çıxış yolunu tapacaq. Hazırda hücum xəttimizi gücləndirmək üçün ciddi transfer işləri aparılır”.

Xatırladaq ki, "Neftçi" Saldanyanı bu ilin yanvarında Yaponiyanın "CEF Yunayted" klubundan birilliyə icarəyə götürmüşdü.

"Football-plus.az" xəbər verir ki, braziliyalı ilə bağlı məsələ o qədər də qəliz deyil.

Flaqmanın yaydığı bəyanatda hadisənin məzmunu açıqlanıb. Lakin biz məsələnin digər tərəflərini diqqətinizə çatdıracağıq. Saldanyanı Belqrad klubu “PARI Premyer” kubokunda bəyənib. Söhbət konkret “Srvena Zvezda” ilə matçdan gedir. Bundan sonra “Partizan”ın rəsmiləri oyunçunun meneceri ilə təmasa keçiblər. Onsuz da futbolçunun özü “Neftçi”dən ayrılmaq istəyirdi. Xatırlayırsızsa, o, Rusiya mətbuatına açıqlamasında təklif gələcəyi təqdirdə “Zenit”ə keçə biləcəyini demişdi. Sonradan klubun mətbuat xidmətinin təzyiqi ilə fikirlərini təkzib etmişdi. Yəni Saldanya “Neftçi”dən ayrılmağı çoxdan beyninə salmışdı. Bunun səbəbi nədi? “Neftçi” bu həftəsonu 2 yeni transfer açıqlayacaq. Onlar hücumçulardı. Oyunçuların adlarını öyrənə bilməsək də, birinin afrikalı, birinin cənubi amerikalı olduğunu aydınlaşdırmışıq. Futbolçular Mutunun istəyi ilə komandaya cəlb olunub. Bunu bilən braziliyalı bir çox hallarda ehtiyatda qalacağını anlayır. Bu səbəbdən də “Partizan”ın təklifi dəyərləndirmək istəyib. Belqrad təmsilçisi oyunçuya “Neftçi”nin verdiyindən daha çox maaş təklif edib. Saldanya sonradan ehtiyatda qalmaqdansa, indidən komandadan ayrılmağı daha məqbul sayıb.

Gələn məsələnin maraqlı tərəfinə. Maliyyə problemi ilə üzləşən, Patrik Andrade ilə qarşılıqlı razılıq əsasında yolları ayıran “Partizan” braziliyalıya necə daha artıq maaş verə bilir? Burdakı məsələ Belqrad klubunun daxili işidi. Əslində “ağ-qaralar”da iki rəhbərlik var. Onlardan biri idman, digəri futbol komandasında söz sahibidi. Daxili çəkişmələr klubun maliyyəsinə xüsusi təsir edir. Düzdü, “Partizan” bir çox oyunçuları ilə yolları ayırdı. Bunlardan biri də Patrik Andrade idi. Sadəcə, kabo verdeli oyunçunun 3 aylıq maaşı ödənməmişdi. Yarımmüdafiəçi də bundan istifadə edərək FIFA-ya şikayət etdi və Belqrad təmsilçisi ilə yolları ayırdı. “Partizan” oyunçunun azı 2 aylıq maaşını ödəsəydi, Patrik də “ağ-qaralar”da qalacaqdı. Yəni Belqrad klubunda işlər qaydasındadı. Sadəcə, komanda əlavə yük hesab olunan oyunçulardan canını qurtarıb. İndi isə yaxşı heyət formalaşdırmaq niyyətindədi.

Bir sözlə, Saldanya məsələsində qeyri-adi heç nə yoxdu. Əvvəlcədən gözü başqa yerlərdə olan braziliyalı əlinə fürsət düşən kimi “Neftçi”ni yarıyolda qoydu. Düzmü etdi? Bu artıq başqa mövzudu. Əslində peşəkar klubun rəsmiləri futbolçulardan mənəvi bağlılıq gözləməməlidi. Çünki dünyada futbolçuluğu iş olaraq görürlər. Saldanya da daha yaxşı şərait və pul təklif edən yerə, təbii ki, qaça-qaça gedəcək.

İLKİN SULTANLI