Elmar Baxşıyev Boludan razı qayıdıb - AÇIQLAMA
"Qəbələ" Türkiyənin Bolu şəhərindəki təlim-məşq toplanışını srağagün başa vurub.
İyulun 10-da qardaş ölkəyə yollanan “qırmızı-qaralar” Boluda üç yoxlama oyunu keçirib. “Qəbələ” Moldovanın “Sukleya” (4:2), Rusiyanın “Orenburq” (1:1) və Şimali Makedoniyanın “Qostivar” (3:1) klubları ilə üz-üzə gəlib.“ Qırmızı-qaralar” bu gün hazırlıq prosesini bərpa edib.
Görəsən, Bolu toplanışını və komandanın son durumunu necə dəyərləndirmək olar?
Bu sualı baş məşqçi Elmar Baxşıyevə ünvanladıq. Təcrübəli mütəxəssisin "Football-plus.az"a söylədikləri:
"İki hazırlıq dövründə 4 yoxlama oyunu keçirdik. Ümumi dəyərləndirsək, prosesi məhsuldar saymaq olar. Çox intensiv, qısa aralarla oyunlar keçirdik. Günü fitnes məşqlərini də nəzərə almaqla əsasən iki məşqlə tamamladıq. Düşünürəm ki, komanda lazımi yükləməni aldı. Kollektiv həm fiziki, həm də taktiki planda istədiyimiz səviyyəyə yaxınlaşır. Yeni futbolçular komandaya sürətlə inteqrasiya olunmaqdadı. Bunu keçirdiyimiz oyunlar da sübut edir. “Omoniya” ilə oyuna az qalıb və bu zaman kəsiyindən maksimum istifadə edəcəyik. İnanıram ki, komanda meydanda istədiyimi verəcək".
Xatırladaq ki, Konfrans Liqasında mübarizə aparacaq “Qəbələ” iyulun 27-də evdə Cənubi Kipr “Omoniya”sı ilə qarşılaşacaq.
KƏNAN BAHADIR
Digər xəbərlər
