“Qarabağ”ın həm ölkə daxili, həm də beynəlxalq yarışlarda nəticələri yaxşı olsa da, akademiyanın fəalliyyəti ürəkaçan deyildi.

Son illərdə Ağdam təmsilçisinin yetirmələri gözə dəymirdi. Bu səbəbdən də dəyişiklik mütləq idi. “Köhlən atlar”ın rəhbərliyi yeni akademiyanın da tikintisini həyata keçirmək istəyir. Deyəsən, “Qarabağ” artıq gənc futbolçuların yetişdirilərək satılmasından yanadı. PRO kateqoriyalı Aftandil Hacıyevin akademiyanın direktoru vəzifəsinə təyini də bunun əyani sübutudu. “Köhlən atlar” təcrübəli mütəxəssislə 3 illik müqavilə imzaladı. “Qarabağ” akademiyasının bundan sonrakı missiyasını öyrənmək üçün 41 yaşlı mütəxəssislə əlaqə saxladıq. Aftandil bəyi təbrik edərək yeni işi ilə bağlı söhbətləşdik...



- Biz gözləyirdik ki, siz premyer-liqa və ya 1-ci divizion klublarının birində baş məşqçi kimi fəalliyyət göstərəsiz. Necə oldu ki, “Qarabağ”ın akademiyasının direktoru olmaq təklifini qəbul etdiz?
- Düzdü, premyer-liqa klublarından təkliflərim var idi. Ümumi dəyərləndirmə aparırdım. Daha sonra mənə doğma olan, uğurları üçün tər tökdüyüm “Qarabağ”dan təklif gəldi. Mən də bunu dəyərləndirmək istədim. Ağdam təmsilçisi üçün gənc və istedadlı futbolçular yetişdirmək istəyirəm. Mən təklifi qəbul edən zaman təkcə “Qarabağ”ı düşünmədim. Yeni layihə sayəsində Azərbaycan futbolu üçün də yaxşı işlər görmək istəyirik. Akademiyamızdan çıxacaq hər bir oyunçu ölkəmizdə bu idman növünün inkişafına töhfə verəcək.


- Qəbul edərsiz ki, son illərdə “Qarabağ” akademiyasında işlər qaydasında getmirdi. Aşağı yaş qrupu üzrə komandaların nəticələri heç də ürək açan deyildi...
- Məhz bu məsələnin də dəyişikliyə təsiri oldu. Klub rəhbərliyi akademiyanın inkişaf etməsini istəyir. Artıq əsas məqsədlərimizdən biri də “Qarabağ”ın akademiyasından yaxşı uşaqların çıxmasıdı. Klub olaraq avrokuboklarda uğurlu nəticələr əldə edirik. Ölkə çempionatında çempionluqlar qazanmışıq. Komandamız beynəlxalq aləmdə çox yaxşı tanınır. İndi yaxşı futbolçular yetişdirərək onları dünyaya tanıtmalıyıq. Hər halda öz layihəmiz üzərində işləyəcəyik. İnşallah, hər şey istədiyimiz kimi olacaq.


- Gördüyümüz qədəri ilə ağır və çətin işin altına girirsiz. Bu, sizi qorxutmur?
- Əlbəttə ki, yox. Hər iş çətindi. Şükürlər olsun ki, müəyyən təcrübəm var. “Qarabağ” struktur baxımından çox yaxşı formalaşıb. Belə bir yerdə işləmək çətin olmur. İndi əsas olan işimizi düzgün qurmaq və lazımi şəraitdən maksimum faydanlanmaqdı. Bundan sonra hər şey qaydasına düşəcək. İşimizin nəticəsi görsənəcək.

- Aftandil bəy, akademiyadanın məşqçilər heyətində hansısa dəyişiklər edəcəksiz?
- Bəli! Bu işin qaydası belədi. Dəyişiklər lazım olan yerdə edilməlidi. Məşqçilər heyəti ilə görüşümüz olub. İnciməklik bir şey yoxdu. Əlbəttə ki, aralarından qalanlar olacaq. Çalışacağıq ki, “Qarabağ”ın adına layiq işlər görən şəxsləri akademiyamıza cəlb edək.


- Avropanın bir çox ölkələrində komandanın sabiq üzvlərini akademiyaya dəvət edirlər ki, uşaqlar və gənc futbolçularla məşğul olsun. “Qarabağ” da bu sistemi tətbiq etmək olar?
- Əlbəttə ki! Məhz bunu etməyi planlaşdırırıq. Əsas məqsədim budu. Düz buyurursuz. Dünyada bu sistemdən istifadə olunur. Biz də “Qarabağ”da top qovmuş, sistemini bilən şəxsləri öz komandamıza dəvət edəcəyik. Düşünürəm ki, bu, daha yaxşı işləməyimizə şərait yaradacaq.

- Maşallah, “Qarabağ”ın sabiq üzvlərinin çoxu demək olar ki, işlə təmin olunub. Seçim etmək şansınız azdı. Bu bir az işinizi çətinləşdirməyəcək ki?
- Bu istiqamətdə axtarışlarımız davam edir. Hətta danışıq apardığımız və müsbət nəticə əldə etdiyimiz şəxslər var. Onlar tezliklə işə başlayacaqlar. İndi ad açıqlamağımız doğru olmaz. Bir neçə gün ərzində məşqçilərimizin adları bəlli olacaq. Yenə qeyd edirəm, yaxşı işlər görmək istəyirik. “Qarabağ”da güclü və istedadlı uşaqlar yetişməlidi. Bu işdə Ağdam təmsilçisinin sabiq üzvləri bizə kömək olmalıdılar. Onlar “Qarabağ”ın oyun tərzini, sistemini uşaqlara öyrətməlidilər.

İLKİN SULTANLI