Son dönəmlərin ən səs-küylü transferlərinə imza atan ərəblər dünya futboluna damğa vurmaqda davam edirlər.

Bu vaxta qədər Səudiyyə Ərəbistanına əsasən Kriştiano Ronaldo, Benzema, Kante, Firmino kimi Avropada sözünü demiş və karyerasının sonuna yaxınlaşmış futbolçular yollanırdı. Və yaxud da Ruben Neveş kimi yalnız Yaxın Şərqdə böyük pullar qazana biləcək nisbətən gənc və ortabab oyunçular ora gedirdi. Amma ərəblər bu dəfə Avropada önəmli ulduzlardan sayılan və yaşı ötməyən bir futbolçunu özlərinə cəlb edə biliblər. "Football-plus.az" xəbər verir ki, söhbət “Latsio”nun serbiyalı yarımmüdafiəçisi Sergey Milinkoviç-Saviçdən gedir. “La Repubblica” nəşrinin yazdığına inansaq, təcrübəli yarımmüdafiəçi karyerasını “Əl-Hilal”da davam etdirməyə razılıq verib. Bu klub futbolçuya illik 20 milyon avro məvacib olmaqla 3 illik müqavilə, “Latsio”ya isə 40 milyon avro təzminat təklif edib!

Milinkoviç-Saviç 2015-dən “Latsio”nun şərəfini qoruyurdu. O, bu müddətdə romalılarla 1 dəfə (2019) ölkə kubokunu və 2 dəfə (2017, 2019) ölkə superkubokunu qazanmışdı. İldən-ilə oyununu, fiziki göstəricilərini yaxşılaşdıran, qüvvətli zərbələrə və əla ötürmələrə malik olan yarımmüdafiəçi “Latsio”nun əsl lideri sayılırdı. Son illərdə, demək olar, Avropanın bütün nəhəng klubları onunla maraqlanırdı. Bura “Liverpul”, “Çelsi”, “Mançester Siti”, “Mançester Yunayted”, “Bavariya”, “Yuventus” və PSJ daxildi. Hər yay onun Romanı tərk edəcəyi gözlənilsə də, “Latsio” prezidenti Klaudio Lotito hər dəfə onu qəribə şəkildə heyətdə saxlamağı bacarırdı. Hətta ötən yay “Yuventus” bu futbolçuya görə 120 milyon avro təklif etmişdi! Amma iyunun əvvəllərində Milinkoviç-Saviç gözlənilməz qərar verdi. O, rəhbərliyə “Latsio”nu tərk etmək istədiyini dedi. Futbolçunun müqavilə müddəti 2024-də başa çatırdı. Aydın məsələdi ki, romalılar onu havayı buraxmaq istəmirdi. Serbiyalıya yenə önəmli klublardan təkliflər yağmağa başladı. Amma cəmi 28 yaşı olan, karyerasının zirvə nöqtəsində olan, dəyərinə görə Avropanın ən bahalı 8-ci mərkəz yarımmüdafiəçisi (hazırda onun dəyəri 50 milyon avrodu) sayılan və hələ bir çox titul qazanmaq fürsəti olan futbolçu tam başqa varianta üstünlük verdi. Onun qərarını təkcə futbol dünyası yox, “Latsio” prezidenti Klaudio Lotito da anlamır: “8 ildən sonra o, mühiti dəyişmək və başqa kluba keçmək istədiyini dedi. Bizim pulla bağlı problemimiz yox idi. Problem onun beynindədi. Mənim aləmimdə bir futbolçu Səudiyyə Ərəbistanına yollanırsa, bunu yalnız pul qazanmaq üçün edir. Sona qədər onu fikrindən daşındırmağa çalışdım. Hətta maaşını yüksəltməyi təklif etdim. Amma o özü ayrılmaq istəyirsə, mən nə edə bilərəm?! Hər kəs öz həyatı ilə bağlı seçimini özü edir. Sergeyin bu qərarı karyerasını başa vurmaq mənasını verir. Ona söz vermişdim ki, sərfəli təklif olsa, buraxacam. Bizə 40 milyon avro təklif olunub. Mən, sadəcə, verdiyim sözün üstündə dururam”.

Milinkoviç-Saviç “Əl-Hilal”da 3 ilə 60 milyon avro qazanacaq. Avropada qalsaydı, bundan kəskin dərəcədə az məbləğ qazanmayacaqdı. Amma o, yeni səviyyəyə yüksəlmək, ÇL-i qazanmağa cəhd etmək əvəzinə karyerasını pula qurban verdi.