MS üç kuboku 102 yaşlı azarkeşinin hüzuruna apardı!
Son mövsümü trebl ilə bitirən “Mançester Siti” çox maraqlı aksiya keçirib.
“Football-plus.az” xəbər verir ki, klub qazandığı üç kuboku ən sadiq azarkeşlərinin hüzuruna aparır. İlk “dayanacaq” Mançesterdəki qocalar evi olub. “Siti”nin ən yaşlı fanatı, 1920-ci illərdən komandaya azarkeşlik edən Ceffri Rotband məhz burda yaşayır. Demək olar ki, bir əsrə yaxındı komanda ilə birgədi!
Polad kimi möhkəm Ceffri “Siti” fanatlarının bir neçə nəslinin böyüməsinə şahid olub. Rotband, demək olar ki, klub tarixinin bütün titullarını görüb. Əlbəttə, 1904-cü ildə qazanılan ölkə kuboku istisnadı. Klubla ən ağır dövrləri arxada qoyub, daim oyunları stadiondan izləyib. Ceffrinin oğlu klubun qocalar evində onu ziyarət etməsinə belə reaksiya verib: “Mançester Siti” sağ olsun, atama xoşbəxtlik bəxş etdi. Gələn ay qeyd edəcəyi 103 illik ərəfəsində bütün mükafatları onun qaldığı qocalar evinə gətirmək... Çox qeyri-adi hərəkətdi. Fanatlar birlikdə bayram edir, biz bir ailəyik”.
Daha bir maraq doğuran tarixçə 83 yaşlı fanat Cim Dolanla bağlıdı. Cim altı həftə əvvəl insult keçirib. Məhz bu səbəbdən Çempionlar Liqasının “İnter”lə final oyununa yollana bilməyib. Belədə bileti oğluna verib. Düzdü, oğlu futbolu sevmir, ancaq atası naminə İstanbula yollanmağa razılıq verib. Dolanlar ailəsində zarafatlaşırlar ki, onlardan kimsə belə əlamətdar hadisəni canlı görməliydi. Cim tədricən yaxşılaşır, “Siti” isə ədalətsizliyi aradan qaldırmaq yolunda addım atdı: qənimətləri fanatın evinə apardı! Cim “Manchester Evening News” qəzetinə verdiyi müsahibədə klubun bu jestinə görə sevincini gizlətməyib:
“14 yaşımdan abonementim var, bileti isə ilk dəfə 1974-cü ildə almışam. Bundan bir il əvvəl işə düzəlmişdim və yaşla bağlı yalan danışmışdım ki, həftədə bir funt artıq qazanım. Bu yolla köhnə “Meyn-roud”da keçirilən oyunlar üçün mövsümlük abonement aldım. Bu mövsümün son oyunu ərəfəsində özümü pis hiss etdim. Düşündüm ki, yəqin koronavirusa yoluxmuşam, ancaq insult imiş. Bir neçə gün sonra oftalmoloqun yanına yollandım. Onlar isə məni xəstəxanaya göndərdilər. Həyatım dəyişdi. İngiltərə kubokunun final oyununun son 5 dəqiqəsinə baxa bildim. Nə qədər pis olsam da, Çempionlar Liqasının finalına baxdım. Bu oyunu buraxa bilməzdim. Sadəcə, buraxa bilməzdim! İndi isə Çempionlar Liqasının kuboku mətbəxdə - gözümün önündədi. Həyatımda bir daha belə hadisə təkrarlanmayacaq”.
Digər xəbərlər
