Neymar böyük məbləğdə ziyana düşüb. PSJ-nin hücumçusu vətəni Braziliyadakı villasında süni gölməçə yaratdığına görə 3,3 milyon dollar cərimələnib.


"Football-plus.az" xəbər verir ki, ulduz futbolçunun torpaq sahəsi Rio de Janeyronun cənub sahilində - Manqaratibada yerləşir. Yerli hakimiyyət Neymarı süni gölməçə və üzgüçülük sahəsi inşa etdirdiyinə görə 16 milyon real (təxminən 3,3 milyon dollar) cərimələyib. Prokurorluğun məlumatına görə, futbolçu inşaat işlərinə lisenziyasız başlayıb və lazımi ekoloji nəzarəti həyata keçirməyib. Bundan əlavə, o, həm də “torpağı köçürmək” və “bitki örtüyünü məhv etmək” maddələri ilə ittiham olunub.

Daha əvvəl yerli təbiəti mühafizə xidmətləri anonim siqnal əsasında Neymarın əmlakını yoxlamış və çaydan suyun icazəsiz çıxarılması da daxil olmaqla ekoloji standartların pozulması hallarının olduğunu bəyan etmişdi. Bundan sonra su anbarından və çimmək zonasından istifadə qadağan edilmiş, bu ərazilər lentlə əhatəyə alınaraq elanlar yerləşdirilmişdi. Amma Neymar bir neçə gün sonra qadağalara məhəl qoymayaraq gölməçədə çimdiyini əks etdirən fotolarını sosial şəbəkələrdə yerləşdirmişdi. İndi onun yerli hakimiyyətin qərarına etiraz etmək üçün 20 gün vaxtı var.