Neymar vətəni Braziliyada 1 milyon dollar cərimələnə bilər. İş ondadı ki, PSJ-nin forvardı Rio-de-Janeyronun 130 kilometrliyindəki malikanəni təbiəti qoruyan təşkilatlardan icazə almadam tikdirib.

Meriyadan yayılan açıqlamaya görə, yerli hakimiyyət orqanları su yolunun dəyişdirilməsi və çaydan icazəsiz suyun götürülməsi də daxil olmaqla ən müxtəlif ekoloji pozuntuları üzə çıxarıb. Onlar həmçinin icazəsiz qazıntı işlərinin aparılması, torpaq, daş və qayaların daşınması, icazəsiz çimərlik qumundan istifadə edilməsi ilə bağlı halları da müəyyənləşdirib.

Meriyada onu da bildiriblər ki, hakimiyyət orqanlarının növbəti addımı üzə çıxarılan qanun pozuntularının dəyərləndirilməsi və cərimə məbləğinin müəyyənləşdirilməsi olacaq.

Futbolçunun vurduğu ekoloji ziyan təxminən 5 milyon real (1 milyon dollara yaxın – red.) həcmində dəyərləndirilir. Futbolçunun atası, böyük Neymar təftiş zamanı tikinti yerondə olub. Sosial şəbəkələrdə yayılan videolarda onun məmurlarla mübahisə etdiyi görünür.

Belə görünür ki, Neymarın cığallığı yaşıl meydanın sərhədləri ilə məhdudlaşmır. O, hər yerdə imicinə sadiqdi. Baxmayaraq ki, bu sadiqlik futbolçuya milyon dollar bahasına başa gələcək.

"Football-plus.az"