Ötən mövsüm maliyyə sarıdan müəyyən çətinliklə üzləşən “Qəbələ”nin ölkə kubokunu başı üzərinə qaldırmasından sonra düşünmək olardı ki, bölgə təmsilçisində büdcə artımı olacaq. Elmar Baxşıyevin çalışdırdığı komanda heyəti bir qədər də gücləndirib Konfrans Liqasında ölkəmizi layiqincə təmsil edəcək. Ancaq hazırda fərqli mənzərəyə şahidlik edirik. Ötən “futbol ili”ndə “qırmızı-qaralar”ın uğurlu çıxışında pay sahibi olan, özünü yaxşı tərəfdən göstərən əksər futbolçular başqa klublara üz tutur.

Məqsəd İsayev, Səlahət Ağayev, Ramon Maçado və Felipe Santosun düşərgədən ayrıldığını xəbər vermişdik. Artıq komandanın “düşünən beyni” İsnik Alimi və müdafiənin dirəyi Ruan Renato da bölgə təmsilçisi ilə vidalaşıb. Hər iki futbolçunun “Zirə” ilə anlaşdığı deyilir. Klubun yetirməsi Rövlan Muradov da bölgə təmsilçisini tərk edənlər sırasındadı. O isə “Sumqayıt”la anlaşıb.

Təxminən bir aydan sonra “Qəbələ”ni Konfrans Liqasında çətin “Omoniya” sınağı gözləyir. Belə məsul oyun ərəfəsində lider futbolçuların düşərgəni tərk etməsi baş məşqçi Elmar Baxşıyevi qayğılandırmaya bilməz. Görəsən, o nə fikirləşir, ağır durumdan necə çıxmağı düşünür?

"Football-plus.az" olaraq bu və bizi maraqlandıran başqa suallara cavab tapmaq üçün “Qəbələ”nin baş məşqçisi ilə söhbətləşdik.

- Elmar bəy, öncə rəqib, daha dəqiq desək, “Omoniya” ilə bağlı fikirlərinizi bölüşərdiz.
- Rəqibimiz bu gün bəlli oldu. Qarşıdakı günlərdə daha ətraflı məlumat toplamağa çalışacağıq. Bizim üçün ən önəmlisi öz komandamızın qısa vaxtda formalaşmasıdı. Bildiyiniz kimi, çox sayda oyunçu düşərgəni tərk edib. İndiki anda rəqibi yox, daha çox özümüzü fikirləşməliyik. Qısa vaxtda gedənlərin əvəzinə yeniləri dəvət etməli, boşluqları aradan qaldırmalıyıq. Ondan sonra rəqibi təhlil edəcəyik.

- Heyətdən söz düşmüşkən, mövsümlərarası fasilədə “Qəbələ”nin güclənəcəyini düşünürdük. Təəssüf ki, əksini görürük. Bir çox aparıcı futbolçu düşərgəni tərk edib. Nə baş verir?
- Bəli, çox təəssüf ki, heyətin əsas oyunçularını saxlaya bilmədik.

- Bəs boşluğu necə doldurmaq fikriniz var?
- Təəssüf ki, maraq dairəmizə düşən yerli futbolçuların hamısının klubları ilə müqaviləsi davam edir. Bu üzdən məcburuq ki, boşluqları legionerlər hesabına dolduraq. Bu yöndə axtarışlar davam edir. Amma hələ ki heç bir yenilik yoxdu.

- Yeni legionerlər dəvət etmək fikrində olduğunuzu bildirdiz. Belədə ortaya sual çıxır: “Qəbələ”nin büdcəsi yeni əcnəbilər dəvət etməyə imkan verirsə, onda niyə oturuşmuş heyəti dağıdırsız? Yeni gələnlər qısa vaxtda sizin futbol fəlsəfənizi mənimsəyə biləcək?
- Müəyyən bəlli büdcəmiz var. O büdcədən də kənara çıxa bilmirik. Bizdən ayrılan futbolçuların yaxşı mövsüm keçirdiyi heç kimə sirr deyil. Məhz bu üzdən digər klublar “Qəbələ”nin təklif etdiyindən iki dəfə artıq maaş təklif edir. Bu da bizə heyəti qoruyub saxlamağa imkan vermir.

- Açığı, gözlənirdi ki, ölkə kubokunu başı üzərinə qaldıran, avrokubokalara vəsiqə qazanan klubun büdcəsi artacaq. Ancaq siz maliyyə çətinliyini qabardırsız...
- Büdcənin artıb-azalması ilə bağlı sual mənə aid deyil. Bu üzdən cavab verə bilməyəcəm. Bəli, komandanın önəmli futbolçularını itirmişik. Onu zaman göstərəcək ki, onların boşluğunu aradan qaldıra biləcəyik, ya yox.

- Təxminən bir aydan sonra “Omoniya” ilə oyuna çıxacaqsız. Necə düşünürsüz, həmin vaxta qədər heyəti komplektləşdirə biləcəksiz?
- İnam olmasaydı, burda qalmazdım. İnam olmayan yerdə işləməyə də dəyməz. İnanıram ki, qarşıdakı günlərdə bizə lazım olan oyunçuları “rənglərimizə bağlaya” biləcəyik. Ancaq o fikrinizlə razıyam ki, gedən futbolçular “Qəbələ”nin heyətində 2-3 il çıxış edib. Oturuşmuş, müəyyən oyun dəst- xəttinə malik komandamız var idi. Bəlli bir sistemə malik idik. Heyət dəyişirsə, hər şeyə yenidən başlamalıyıq. Yenə də xeyirlisi.

- Ötən mövsümün gedişində komandanın avrokuboklara vəsiqə qazanacağını əminliklə söyləyirdiz. Artıq Konfrans Liqasında rəqibiniz də məlumdu. “Qəbələ”nin növbəti mərhələ şansı nə qədərdi?
- Yenə deyirəm, heyət komplektləşməlidi. Yalnız bundan sonra şanslar barədə danışa bilərik. Ötən il Macaristan təmsilçisi “Fehervar”la səfər oyununda əziyyət çəkdik. Heyət kasad olduğundan istədiyimiz oyunu ortaya qoya bilmədik, əvəzetmələrdə sıxıntı yaşadıq. Ümid edirəm ki, futbolçu sayı baxımından bu dəfə çətinliyimiz olmayacaq.

RƏŞAD