Misli premyer-liqasında və ölkə kubokunda mövsüm başa çatdı. 2022/23 "futbol ili"ndə ən qızğın müzakirələrin mövzusu "Neftçi" oldu. Tarixi uğurlara imza atan klubun azarkeşləri mövsümboyu Bakı təmsilçisini tək qoymadısa, kubokun final matçında "istefa" şüarları "Bakcell Arena"nı lərzəyə gətirdi.

"Football-plus.az" olaraq bunu nəzərə alıb "ağ-qaralar"ın ən böyük fanklubu "Forza Neftçi"nin rəhbəri Səccad Abbasovla söhbətləşdik.

- Yekun nəticələrə görə "Neftçi" premyer-liqada bürünc medalları təmin etdi və Konfrans Liqasına vəsiqə qazandı. Buna baxmayaraq, azarkeşlər həm tribunalarda, həm də sosial şəbəkələrdə qəzəbli görünürdü. Xüsusilə kubokun final matçından sonra narazılıqlar artdı...
- Ötən mövsüm "Neftçi" adına layiq çıxış etmədi. Çempionatdan ümidlər çoxdan kəsilmişdi. Heç olmasa, titul qazanmaq şansımız var idi. Onu da öz əlləri ilə "Qəbələ"yə verdilər. Sonra isə, həmişə olduğu kimi, çıxıb "gələn mövsüm başqa "Neftçi" görəcəksiz" kimi boş vədlər verdilər. Yaxşı bilirik ki, bu komandada büdcənin azlığından söhbət gedə bilməz. Vaxt var idi ki, ağ-qara formanı geyib meydana çıxmaq oyuna 1:0 öndə başlamaq demək idi. İndi, sadəcə, "Neftçi"nin adı və ona sahib çıxan fanatları qalıb.

- Kubokun final matçı güclülərin dueli olsa da, əksəriyyət "Neftçi"ni favorit görürdü. Sonda “ağ-qaralar” məğlubiyyətlə barışmağa məcbur oldu. Oyunu necə dəyərləndirirsən?
- "Forza Neftçi" olaraq, yüksək səviyyədə hazırlaşmışdıq. Fanklubun edə biləcəyi hər şeyi edib son ana qədər komandanı dəstəklədik. Amma bunun qarşılığında qaçmayan, qapıya zərbə vura bilməyən "Neftçi" gördük. Sanki bəzi futbolçular meydana uduzmaq üçün çıxmışdı.

- Rəhbərlik baş məşqçidən və futbolçulardan daha çox tənqid olunur. Ənənəvi sual olsa da, kimdi günahkar?
- Birincisi rəhbərlik... Hazırkı şəxslərlə hansısa yarışda mərhələ keçməyə ümidimiz yoxdu. Komanda yenidən qurulmalıdı. Sistem olmayan heyətlə avrokuboklarda çıxış etməyin nə mənası var? Böyük əhəmiyyətli beynəlxalq yarışda bu komandanın uğur qazana biləcəyinə inanmıram. Kor-təbii oyunla nə premyer-liqada, nə də avrokuboklarda yaxşı nəticə əldə etmək mümkündü.

- Müşahidə Şurasından tələbiniz nədi?
- "Neftçi"ni çempion görmək istəyirik. Futbolçular meydanda vuruşsa, nəticə gələcək. Növbəti mövsümdə tələb etdiyimiz dəyişikliklər olmasa, mövqeyimizi açıq ortaya qoyacağıq.

- Azarkeşlər heyətdə "döyüş ruhu"nun olmadığını dilə gətirir. Bununla yanaşı, baş məşqçi və rəhbərlik də qınanılır. Hədəflərə nail olmaq üçün hansı dəyişikliklər olmadı?
- Futbolçulardan özünü yaxşı tərəfdən göstərənlər çox azdı. Elə oyunçular var ki, hansı komandanın şərəfini qoruduğunun fərqində deyil. "Neftçi"də ağ-qara formaya layiq oyunçu bir əlin barmağını keçməyəcək qədər azdı. Rəhbərliyə gəlincə, bacarmadıqları aşkar ortadadı. İstefa verib getməlidilər. Nə Zaur Əzizova, nə Kamran Quliyevə, nə də Laurentsiu Regekampfa "Neftçi"də yer var. "Neftçi"yə onu sevəcək, tarixini qoruyub saxlayacaq adamlar lazımdı.

KƏNAN BAHADIR