“Qəbələ”nin heyətində ölkə kubokunu qazananlardan biri də Felipe Santosdu. "Football-plus.az" olaraq onunla söhbətdə maraqlı mövzulara toxunduq.

- “Neftçi”ni 1:0 hesabıyla məğlub edərək ölkə kubokunun qalibi olduz. Nələr hiss edirsən?
- Çox xoşbəxtəm. Özümü möhtəşəm hiss edirəm. Çünki ilk saniyələrdən sona kimi çətin mübarizə şəraitində keçən qarşılaşmada qələbə qazandıq. Buna görə azarkeşlərimizi təbrik edirəm. Onlar hər şeyin ən yaxşısına layiqdi. Bu görüşdə bizi tək qoymadılar. Oyunun əvvəlindən sonuna kimi dəstək oldular. Onların sevgisi sayəsində “Neftçi”ni məğlub edə bildik.

- Görüşdən öncə “Neftçi”nin qalib gələcəyini düşünənlər daha çox idi. Nə baş verdi ki, siz daha yaxşı oyun sərgiləyərək qələbə qazandız?
- Əsas məqam bu fikirlərə önəm verməməyimiz oldu. “Neftçi” güclü komandadı. Bunu kollektivimizdəki bütün futbolçular bilirdi. Lakin bu mövsüm dəfələrlə sübut etmişdik ki, istənilən rəqiblə oynaya bilərik. Premyer-liqada “Neftçi”ni, “Zirə”ni məğlub etmişdik. Kubokda “Qarabağ”ı mübarizədən kənarlaşdırmışdıq. Çempionatda 4-cü pillənin sahibi kimi Konfrans Liqasına vəsiqə qazandıq. Bunlar bizim də yaxşı və güclü kollektiv olduğumuzun sübutu idi. Bu məqamları düşünərək matça hazırlaşdıq. Sonda istəyimizə çataraq finalda rəqibimizi məğlub edib Azərbaycan kubokunun qalibi olduq. Bu gecə bizim idi. Mənim üçün ilk önəmli çempionluq idi. Buna görə komandamızın bütün üzvlərinə minnətdaram.

- Misli premyer-liqasını daha yuxarı pillələrdə bitirə bilərdiz?
- Əslində öz səhvlərimiz üzündən avrokuboklar mübarizəsi son tura kimi davam etdi. Bizim çox yaxşı kollektivimiz var. İstənilən rəqibi məğlub etmək potensialındayıq. Sadəcə, səhvlərimiz üzündən 4-cü pillədə qərarlaşdıq. Kubokda sübut etdik ki, güclü rəqibləri məğlub edə bilərik. Bundan əlavə, premyer-liqada mübarizə son həddə idi. “Qarabağ”, “Sabah”, “Neftçi”, hətta “Zirə” bizə çətinlik yaratdı. Özümüzə bir qədər də inansaydıq, çempionatda da mükafatçılar sırasında yer ala bilərdik.

- Konfrans Liqasında qrup mərhələsinə vəsiqə qazanmaq ehtimalınız nə qədərdi?
- Bu mövsüm özümüzü yaxşı tərəfdən göstərsək də, güclənməyə ehtiyacımız var. Daha böyük hədəflərə çatmaq üçün “Qəbələ” çatışmazlıqları aradan qaldırmalıdı. Bəli, bu gün “Neftçi”ni məğlub etdik. Əla performans sərgilədik. Lakin Konfrans Liqası üçün daha artığını etmək lazımdı. Orda “Qəbələ”ni daha güclü rəqiblər gözləyir. Bunu nəzərə almaq, boşluqları doldurmaq lazımdı.

- Bu mübarizədə “Qəbələ” ilə birgə olacaqsan?
- Həqiqətən bilmirəm. Bu gün “Neftçi”ni məğlub edərək kubokun qalibi olduq. İndi bunun sevincini yaşayırıq. Qarşıda düşünmək üçün zamanım var. Hər şey ola bilər. İki gün istirahət edəcəm. Daha sonra klub rəhbərliyi, baş məşqçi ilə danışacam. Ondan sonra konkret nə olacağını biləcəm. Amma bir şey söyləyə bilərəm ki, “Qəbələ” mənim ürəyimdədi. Bu komandanın üzvü olduğum üçün xoşbəxtəm. Kubokun qalibi olmağımız məni ikiqat sevindirir. Ümid edirəm ki, hər şey yaxşı olacaq.

- Mediada yazılanlara görə, səninlə maraqlanan bir neçə klub var...
- Yenə deyirəm, indi kubokdakı qələbənin dadını çıxarmaq istəyirəm. İstirahətdən sonra menecerimlə söhbətləşəcəm. Mənim üçün öncəlik “Qəbələ”di. Rəhbərliklə danışandan sonra hər şey bəlli olacaq.

İLKİN SULTANLI