Ölkə kubokunun finalında “Neftçi”ni 1:0 hesabıyla məğlub edən “Qəbələ”nin futbolçuları qələbəni böyük coşqu ilə qeyd edirdi. Onlardan biri də Omar Hani idi. İordaniyalı yarımmüdafiəçi ailəsi ilə birgə sevinc yaşayırdı.

"Football-plus.az" olaraq 23 yaşlı futbolçu ilə kubokda qalib olmaları, komandada qalıb-qalmayacağı barədə söhbətləşdik.

- Azərbaycan kubokunun qalibi olduz. Hansı hissləri keçirirsən?
- Özümüzlə qürur duyuram. Hamımız bu görüşə xüsusi hazırlaşmışdıq. Baş məşqçinin tapşırıqlarını tam yerinə yetirdik. Bunun nəticəsində çempion olduq. “Neftçi”dən daha yaxşı idik. Əla oyun sərgilədik. Komanda olaraq kubokun qalibi olmaq istəyirdik. Çempiona layiq mübarizə apardıq və qalib olduq. Azarkeşlərimizi təbrik edirəm. Stadionda möhtəşəm ab-hava var idi. Bu qələbəni fanatlarımıza həsr edirəm.

- Oyundan öncə çoxları “Neftçi”ni favorit sayırdı. Bu, sizə əlavə motivasiya verdi?
- “Neftçi”yə hörmət edirik. Oyundan öncə şanslar 50-nin 50-yə idi. Lakin onları üstələdik. Kimsə deyə bilməz ki, “Neftçi” bizdən üstün idi. İlk saniyələrdən 90-cı dəqiqəyə kimi biz daha yaxşı oyun sərgiləyirdik. Bu, mənim fikrimdi. Bu gün “Neftçi”dən daha yaxşı idik. Onsuz da onları premyer-liqada məhz bu meydanda məğlub etmişdik. Oyundan öncə söylənilənlərə yox, nəticəyə baxmaq lazımdı. Reallıq odu ki, “Neftçi”ni üstələyərək kubokun qalibi olduq.

- “Qəbələ” Konfrans Liqasında mübarizə aparacaq. Bu turnirdə uğurlu çıxış edə biləcəksiz?
- Bu dəqiqə Konfrans Liqası haqda düşünmürük. Komanda hazırlıq dönəmindən keçməlidi. Bir az istirahət etməliyik. Bundan sonra yeni mövsüm və qarşıdakı hədəflər haqda düşünmək olar.

- Gələcəyinlə bağlı qərar vermisən? “Qəbələ”də qalacaqsan, yoxsa komandanı tərk edəcəksən?
- Həqiqətən hələ heç nə bilmirəm. İndi çempionluğu qeyd edirəm. Daha sonra menecerimlə danışacam. Onunla məsləhətləşəndən sonra özüm üçün ən yaxşısı nədisə, onu da edəcəm.

- Başqa klublardan təkliflərin var?
- Bu haqda ancaq menecerim bilir. Onunla ətraflı söhbət etməmişik. Bütün işləri ona həvalə etmişəm. Yenə deyirəm, menecerimlə danışandan sonra mənim üçün ən yaxşısı nədisə, onu da edəcəm.

- “Qəbələ” ilə ölkə kubokunun qalibi oldun. Bundan başqa, yeni mövsümdə komanda Konfrans Liqasında mübarizə aparacaq. Bu amillər qərarına təsir edəcək?
- Qeyd etdiyiz məsələlər cəlbedicidi. Lakin hələ heç nə bilmirəm. İndi istirahətə ehtiyacım var. Kubokun qalibi olmağımızın dadını çıxarmalıyıq. Bir neçə gün ərzində çox məsələlərə aydınlıq gələcək.

İLKİN SULTANLI