Birinci divizonda 2022/23 mövsümü başa çatdı. 15 komandanın qatıldığı uzun marafonda kim nə ilə yadda qaldı, hansı klub ümidləri doğrultdu, hansı, sadəcə, iştirak xatirinə çempionatda çıxış etdi?

Geridə qalan 28 oyunda adından söz etdirən futbolçu və ya futbolçular oldumu? Bu yazıda qeyd etdiyimiz suallara cavab tapmağa çalışacağıq.

Favorit statusunu doğruldan və mükafatçılar

Bildiyiniz kimi, başa çatan “futbol ili”ndə 6 müstəqil klubla yanaşı, elita təmsilçislərinin 9 əvəzedici heyəti mükafatlar uğrunda mübarizə apardı. Premyer-liqa klublarından yalnız “Sabah” çempionatın startı ərəfəsində oyunçularını başqa elita klublarına icarəyə verdiyini əsas gətirib divizionda iştirakdan imtina etdi. Mövsümün əvvəlindən “Araz Naxçıvan”ın aşağı dəstədə iddialı olacağı, premyer-liqaya vəsiqə uğrunda mübarizə aparacağı məlum idi. Naxçıvan təmsilçisi istər büdcə, istərsə də heyət baxımından qalan 14 komandanı üstələyirdi. Sonda “qırmızı-ağlar” favorit statusunu doğruldaraq çempionluğu bayram etdi. Azər Bağırovun çalışdırdığı kollektiv 28 matçda mümkün 84 xaldan 69-nu topladı. Komanda iki dövrədə yalnız 3 dəfə məğlub oldu, 3 dəfə də heç-heçə etdi. “Qəbələ-2” hər iki qarşılaşmada, MOİK isə bir görüşdə naxçıvanlılarla “sülh bağladısa”, “Zaqatala”, “Neftçi-2” və hər nə qədər təəccüblü olsa da, çempionatboyu autsayderlər sırasında yer alan “Mingəçevir” çempion komandanı “ağ bayraq qaldırmağa” məcbur etdi. “Araz Naxçıvan” həm məhsuldarlıq baxımından, həm də müdafiə xəttində inamlı oyunu ilə qalan 14 komandadan fərqləndi. Muxtar Respublika təmsilçisi 28 qarşılaşmada rəqib qapılarından 69 top keçirib ki, bu da ortalama hər oyuna 2,46 qol deməkdi. Özləri isə cəmi 22 dəfə məyus olub.

“Neftçi-2” və “Turan-2” uyğun olaraq 2-ci və 3-cü yerləri tutdu. İlk turlardan bəlli idi ki, “Araz Naxçıvan”ın iddiasının fonunda bu iki komanda ən yaxşı halda “gümüş” və “bürünc” uğrunda mübarizə aparmaq iqtidarındadı. Nizami Ocaqverdiyevin baş məşqçi olduğu komanda ilk dövrədə sabit çıxış edərək uzun müddət ikinci pillədə möhkəmlənmişdi. Lakin qışdan sonra tovuzlu əvəzedicilərin “təkəri boşaldı və “ağ-qaralar” bundan maksimum yararlanaraq, bir pillə irəliləməyi bacardı ki, sona qədər ikincliyi heç kimə güzəşt etmədilər. Və sonda Rəşad Abdullayevin komandası 1 xal fərqiylə “Turan Tovuz-2”ni qabaqlamaqla gümüş medallara sahib çıxdı.

Ümidi doğrultmayanlar

2021/22 mövsümünün çempionu “Qaradağ Lökbatan”dan, 2015/16 “futbol ili”ndən divizionda çıxış edən “Zaqatala”dan və MOİK-dən çox şey gözlənilsə də, hər üç klub çempionatboyu qeyri-sabit çıxışla yadda qaldı. Lökbatan təmsilçisinin başı klubdaxili intiriqalara qarışdısa, ordu klubu qış fasiləsindən sonra, daha dəqiq desək, Qəzənfər Abbasov “sükan arxasına” keçəndən sonra yuxudan oyandı. Komanda uğurlu seriya yaxalasa da, ilk dövrədəki yersiz xal itkiləri MOİK-in ilk “üçlük”dən kənarda qalması ilə nəticələndi. “Zaqatala” da, demək olar ki, eyni taleyi yaşadı. Qışa qədər fərqli qrafik cızan bölgə klubu ikinci dövrədə özünə gəlsə də, artıq gec idi. Düzdü, Rüstəm Məmmədovun çalışdırdığı komanda son tura qədər “bürünc” iddiasını sürdürürdü. Lakin həmin anda komandanın taleyi öz əlində deyildi. “Ağ-yaşıllar” tovuzluların büdrəcəyi halda istəklərinə çata bilərdilər ki, yuxarıda qeyd etdiyimiz kimi, “boz qurd” “İmişli” ilə matçı qələbə ilə başa vurmağı bacardı. Özünü yaxşı tərəfdən göstərənlər sırasında “Səbail-2”ni qeyd etmək lazımdı. Bəlkə də çoxları mövsümün əvvəlində Asif Mirilinin komandasının sonda 4-cü olacağına inanmırdı. “Dənizçilər”in heyətinin əsasını aşağı yaş qruplarının yetirmələri təşkil etməsinə baxmayaraq, kollektiv inamlı təsir bağışladı. Daha təcrübəli rəqibləri ilə başabaş mübarizə aparmaqla yadda qaldı.

Autsayderlər

Turnir cədvəlinin son üç pilləsində qərarlaşan komandalardan ikisi – “Mingəçevir” və “İmişli” uzun fasilədən sonra 1-ci diviziona döndüyündən onların çempionatı “zirzəmi”də başa vurması hardasa gözlənilən idisə, “Sumqayıt-2”nin 13-cü olması bir o qədər gözlənilməzdi. “Kimyaçılar”ın “ikincilər”i mövsümboyu yetərincə zəif çıxış etməklə yadda qaldı. Onu da qeyd edək ki, 28 turda komandaya üç mütəxəssis rəhbərlik etdi. Çempionata Vüqar Quliyevlə start verən “Sumqayıt-2” fevralda Azər Mehdiyevə tapşırıldı. Ancaq o da komandanı “qara zolaq”dan çıxara bilməyincə, rəhbərlik Vaqif Cavadova etimad göstərdi. Məhz onun gəlişi ilə “kimyaçılar” sonuncu pilləni tərk etdi.
Adından söz etdirənlər və ya...

Açığı, geridə qalan “futbol ili”ndə birinci divizionda adından söz etdirən gənc futbolçu olmadı desək, yanılmarıq. Kimisə xüsusi təqdim etmək, mövsümün tapıntısı olduğunu vurğulamaq qeyri-mümkündü. Bəlkə də hansısa komandada seçilənlər oldu. Ancaq geniş mənada parlaq oyun sərgiləyən, hamının diqqətini cəlb edən gənclərə rast gəlinmədi. 27 qolla çempionatın bombardiri adını qazanan Orxan Əliyevi azarkeşlər hələ “Sumqayıt”, “Xəzər Lənkəran”, “Kəpəz”dən tanıyır. 27 yaşlı orta sahə oyunçusunun xüsusi təqdimata ehtiyacı yoxdu. Bombardirlik yarışında yer alan digər futbolçular da vaxtilə elita klublarının şərəfini qoruyub. Bu səbəbdən təəssüflə də qeyd edək ki, aşağı dəstədə 2022/23 “futbol ili” ölkə futboluna yeni ulduz bəxş etmədən bitdi. 1-ci divizionda oyunların alınıb-satılmasıyla bağlı söhbətləri isə bir başqa dərd və ayrıca yazının mövzusudu.

RƏŞAD