"Futbolçularımda mövsümi yorğunluq vardı. Buna rəğmən, oyuna yüksək motivasiya ilə çıxmışdıq. Rəqib də kifayət qədər güclü və təcrübəliydi. Amma meydanda xarakter göstərdik və sonda minimal hesabla qalib gəldik. Şəki təmsilçisinə də yaxşı oyuna görə təşəkkür edirəm. Həm matçdan, həm də hakimlikdən razı qaldıq.

Fürsətdən istifadə edərək AFFA-ya bu turniri təşkil etdiyi üçün minnətdarlığımı bildirirəm. Medalçılar sırasında yer aldığımıza görə çox sevinirik. Bu bizim müstəqillik tariximizdə ilk uğurumuzdu. Sovetlər dönəmində nailiyyətlərimiz olmuşdu. Bunun bizim üçün ilk uğur səhifəmiz olacağına inanıram.

Muxtar Respublikanın güclüsüyük, amma orda ilişib qalmaq istəmirik. Məqsədimiz daha da böyüyüb, inkişaf etməkdi. Ona görə peşəkarlaşmalıyıq. Növbəti mövsümdə Region Liqasında çempion olmağı hədəfləyirik. Sonra 1-ci diviziona qoşulmaq istəyirik. Şərurda futbol oynamaq üçün yaxşı şərait var. Bir qədər maliyyə sıxıntımız var. Bunu da həll etmək üçün Şərurun zəngin iş adamları ilə danışıqlar aparırıq.

İstəyirik ki, "Arpaçay" tam peşəkar kluba çevrilsin. Planımız daha güclü klublarla tez-tez görüşlər keçirməkdi. Bunun üçün gələcəkdə ayda 2 dəfə Türkiyə klublarıyla yoxlama oyunları keçirməyi hədəfləyirik. Qars, İğdır və digər bizə yaxın bölgələrin təmsilçiləriylə bunu reallaşdıracağıq.

Bir dəfə onlar Muxtar Respublikaya təşrif buyuracaq, bir dəfə isə biz Türkiyəyə gedəcəyik".