“Qarabağ” klubu bizə bu barədə müraciət etməyib. Niyə etmədiklərini deyə bilmərəm. Bunun səbəbini özlərindən soruşa bilərsiz. Deyə bilmərəm ki, maliyyəyə görədi. Ya da azarkeş amili də təsir edə bilər. Təsnifat mərhələlərinə normalda 30 min insan gəlib. Bu qədər azarkeş bəzən stadionu tam doldurur. Bunu Tofiq Bəhramov adına Respubliksa stadionunda görürdük.

Ola bilər ki, Bakı Olimpiya Stadionunda belə məqamda tribunalar boş görünsün. Amma stəkanın hansı tərəfindən baxmaq məsəli düşüncəyə təsir edir. Bu səbəbdən də nə üçün bizim stadionu seçmədiklərini deyə bilmərəm. Lakin həmişə “Qarabağ”ın müraciətinə müsbət cavab vermişik. Bunu deyə bilərəm ki, Olimpiya stadionunda tədbir keçirmək, təbii ki, başqa məkanlardan məsləhətlidi. Çünki bunun haqlı səbəbləri var. Əsas məqam bizim stadionda tamaşaçı sayının çoxluğudu. Sanitar qovşaqları, tualetlər kifayət qədərdi. Hər biri gigiyenik maddələrlə təmin edilib. Stadion böyük olduğu üçün daha çox mühafizə qovşağı var.

Oyunlara azarkeş marağı çox olarkən xeyli sayda mühafizəçi ayrılır. Arenada enerji və qaz da çox istifadə olunur. Biz stadionun elektrik enerjisini, sadəcə, bir nöqtədən yox, 3-4 yerdən alırıq. Yenə də hansısa problemin çıxmaq ehtimalını nəzərə alaraq stadionun generatorlarını istifadəyə veririk. Bu da daha çox yanacaq sərfiyyatı deməkdi. Bunları nəzərə aldıqda, təbii ki, Bakı Olimpiya Stadionunun qiyməti başqa arenalarla müqayisədə daha yüksək olur. Amma nə qədər pul xərcləndiyini deməyə çətinlik çəkirəm. Çünki yuxarıda qeyd olunan amillər məbləğə təsir edir. Lakin bunu xüsusi qeyd edim ki, tamaşaçı sayı qiymətə təsir edə bilər”.