“Neftçi” İK-in rəhbəri Sadıq Sadıqovun "Football-plus.az" saytına müsahibəsi:

- “Neftçi” İK yüksək liqanın həlledici qarşılaşmasında “Araz-Naxçıvan”a uduzmaqla mövsümü gümüş medalla başa vurdu. Əvvəlcə bu oyunla bağlı fikirlərinizi öyrənmək istərdik.
- “Araz-Naxçıvan”ın gücü hamıya məlumdu. Bu gün komanda tarixində 18-ci dəfə ölkə çempionu oldu. Ölkənin 1 nömrəli komandasına, beynəlxalq təcrübəsi kifayət qədər böyük olan rəqibə qarşı çıxış etdik. Komandamız bacardıqca müqavimət göstərməyə çalışsa da, yekunda daha layiqli olan qalib gəldi. Oyunçulardan ciddi narazılığım yoxdu. Bacardıqlarını etdilər.

- Sizcə, çempionluq üçün nə çatmadı?
- Yüksək keyfiyyətli oyunçular. Hər halda, özünüz də gördüz ki, iki komandanın üzvləri arasında ustalıq səviyyəsi baxımıdan fərq nəzərəçarpan dərəcədə idi.

- Bu gün “Neftçi” İK çempionluğu əldən versə də, kuboku qazanmaq şansı var.
- Finaldakı rəqibimiz “Araz-Naxçıvan” deyil. Ona görə də düşünürəm ki, kuboku əldən vermərik. Mövsümü titulla başa vurmaq üçün kubokun finalına ciddi hazırlaşacağıq.

- Bir qədər də cüdodan danışaq. Sizin rəhbərliyiniz dövründə nəticələr daha yaxşı idi. Lakin bugünlərdə Dohada keçirilən dünya çempionatında cüdoçularımızın qazancı yalnız bir bürünc medal oldu. Bu sahəyə yaxşı bələd olan mütəxəssis kimi uğursuzluğun səbəbini nədə görürsüz?
- İdman təşkilatının rəhbəri olduğum üçün digər federasiya rəhbərləri kimi, Cüdo Federasiyasının rəhbərliyi ilə də müntəzəm ünsiyyətdə oluram. Özüm də şahid oluram ki, federasiya rəhbərliyi idmançıların uğur qazanması üçün əlindən gələni edir. Dünya çempionatındakı uğursuzluğun səbəbi barədə dəqiq nəsə deyə bilmərəm. Yəqin ki, millinin məşqçiləri dəqiq səbəb göstərər. Amma yenə deyirəm, federasiya rəhbərliyi ölkəmizdə cüdonun inkişafı üçün lazım olan hər şeyi edir.
- Cüdoçuların potensialına yaxından bələdsiz. Necə düşünürsüz, Olimpiadaya neçə lisenziya qazana biləcəklər? Sizin dövrünüzdə, ötən Olimpiadada cüdo millimiz maksimum heyətlə təmsil olunmuşdu...
- Tokio Olimpiadasında 9 idmançı ilə təmsil olunurduq - 7 kişi, 2 qadın. İnanıram ki, cüdoçularımız bu dəfə də eyni nəticəni təkrarlayacaq və Paris Olimpiadasına da tam heyətlə qatılacağıq.

- Futzaldan fərqli “Neftçi” İK-in basketbol komandası ölkə çempionatında uğursuzluqla üzləşdi. Növbəti mövsümlə bağlı hansı planlarınız var?
- Bu il ilk dəfə basketbol çempionatında çıxış edirdik. Ona görə də müəyyən çatışmazlıqlar oldu. Bu da düşünürəm ki, təcrübəsizlikdən irəli gəlir. Növbəti mövsüm çatışmazlıqları aradan qaldıracağıq və daha iddialı komanda formalaşdıracağıq. Biz heç vaxt uduzmağı xoşlamamışıq.

RƏŞAD