Futzalda cari mövsüm nə qədər sönük keçsə də, çempionatın səviyyəsi aşağı düşsə də, arada yaddaqalan, gərgin və maraqlı idman mübarizəsi şəraitində keçən oyunlar olur.

"Football-plus.az" xəbər verir ki, pley-off mərhələsinin “Neftçi” İK – “Baku Fire” matçları kimi. Bu iki komandanın qarşılaşması yetərincə prinsipial və baxımlı alındı. “Araz-Naxçıvan”ın finaldakı rəqibinin adı “qızıl oyun”da məlum oldu. “Ağ-qaralar” 3 oyunluq seriyadan sonra çətinliklə olsa da, 2022/23 “futbol ili”nin həlledici görüşünə yüksələ bildi. Mayın 15-də keçiriləcək final qarşılaşması ərəfəsində “Neftçi” İK-in təcrübəli futzalçısı Namiq Məmmədkərimovla söhbətləşdik. Millinin sabiq üzvü həm geridə qalan seriyadan, həm qarşıdakı final görüşündən, həm də futzalın bugünkü durumundan danışdı.

- Öncə “Baku Fire” ilə oyunla bağlı fikirlərini bölüşərdin. Necə oldu ki, mövsümboyu məğlub olduğuz komandanı həlledici anda mübarizədən kənarlaşdıra bildiz?
- Onu düz vurğuladız ki, çempionatda “Baku Fire”a uduzmuşduq. Qarşımıza finala çıxmaq məqsədi qoyulmuşdu. İstəyimizə çatmaq üçün əlimizdən gələni etdik. Çempionatda 3 dəfə məğlub olduğumuz komandanı həlledici görüşdə yenmək o qədər də asan deyildi. Ancaq bunu bacardıq. Əvvəlki qarşılaşmalarda oyun baxımından üstün ola-ola uduzurduq. Heç cür bu tilsimi qıra bilmirdik. Kollektiv olaraq həvəsdən düşmədik. İclaslarda öz aramızda dəfələrlə bu barədə müzakirə edir, onları udmağın yollarını axtarırdıq. Pley-offun ilk qarşılaşmasında hesabda öndə olsaq da, yenə uduzduq. İkinci görüşdə toparlanaraq qalib gəldik və cütün taleyini üçüncü matça daşıdıq. Burda isə qalib olduq. Yenə deyirəm, biz “Baku Fire”dan güclü kollektivik. Sadəcə, onlara oyunlarda sanki bəxtimiz gətirmirdi. Ya top qapıya girmirdi, ya da dirəyə tuş gəlirdi. Bu azmış kimi, təsadüfi, çox asan qollar buraxırdıq. Rəqibin heyətində legionerlərin olması da sözünü deyirdi. Son matçda az qala eyni hal təkrarlanacaqdı. Hesabda 2 top fərqi ilə öndə olsaq da, ikinci hissənin gedişində artıq rəqib önə çıxmışdı. Çox şükür ki, toparlana bildik və istədiyimizə nail olduq. Çox möhtəşəm oyun oldu. Pley-offun ikinci qarşılaşmasından sonra Sadıq Sadıqov kollektivi təbrik etdi və “qızıl oyun”a gələcəyini söylədi. İlk yarıdan sonra bizi dəstəklədi, motivasiya verdi ki, bu da təsirsiz ötüşmədi.

- Finalda son illərin dəyişməz çempionu “Araz-Naxçıvan”la qarşılaşacaqsız. Naxçıvan klubunu taxtdan salaraq tarix yaza bilərsiz?
- “Araz-Naxçıvan” çox təcrübəlidi, son illərin dəyişməz çempionudu. Reallığı nəzərə alıb onlara qarşı oynamağın çox çətin olduğunu söyləməliyəm. Rəqibin baş məşqçisi Joze Alesionu beş barmağım kimi tanıyıram. Bilirəm ki, bizə qarşı komandanı necə hazırlayacaq. Ancaq pely-offdan fərqli final bir oyundan ibarətdi. Hər matçın isə öz hekayəsi var. Çalışacağıq mövsümün həlledici görüşündə finala layiq oyun nümayiş etdirək və “Neftçi”nin bir marka olduğunu sübut edək. Açığı, komandada zədəlilərin sayı çoxdu. Elə özüm də zədədən əziyyət çəkirəm, hazırda müalicə alıram. Vərəqə cəzası səbəbindən Rüfət Balakişiyevlə Nurlan Mehdizadə finalı buraxmaq məcburiyyətindədi. Bütün çətinliklərə baxmayaraq, qələbə üçün oynayacağıq.

- Təcrübəli futzalçı kimi fikrini bilmək istəyirik. Cari mövsümün səviyyəsindən razı qaldın?
- Çempionatda komanda sayı nə qədər çox olsa, maraqlı qarşılaşmaların da sayı çox olar. Elə klublar oldu ki, mövsümün sonuna kimi rəqabətə dözə bilmədi. Bəlkə də cari mövsüm azarkeş marağı baxımından o qədər də ürəkaçan olmadı. “Araz-Naxçıvan”, “Neftçi” İK, “Baku Fire” kimi klubların sayı çox olsa, azarkeşlər daha samballı və səviyyəli oyunlar izləyə bilər. Bu həm də yığmanın inkişafına təkan verər.

- Yəqin Futzal Federasiyasının prezidenti Zaur Axundovun son açıqlamalarıyla tanışsan.
- Bəli. Zaur müəllim çox gözəl təkliflər irəli sürüb. Fikrimcə, böyük futbolda olduğu kimi, futzala da AFFA tərəfindən maliyyə ayrılmalıdı. Səviyyəli çempionat, güclü yığma görmək istəyiriksə, bu addım atılmalıdı.

- Futzalda 200 min manata normal, rəqabətədavamlı komanda formalaşdırmaq mümkündü?
- Düzgün idarəçilik olarsa, normal komanda qurmaq olar. Demirəm, həmin komanda çempionluğa oynayacaq. Ancaq ən azı ortabab, liderlərə başağrı ola biləcək kollekiv formalaşdırmaq mümkündü. Ümid edirəm ki, növbəti mövsüm daha güclü çempionat görəcəyik.

- Zaur bəy onu da bildirib ki, komanda sayı artacağı təqdirdə bölgə təmsilçilərinə üstünlük veriləcək. Necə düşünürsən, bölgələrdə futzala maraq olacaq, normal komanda formalaşdıra biləcəklər?
- Bəlkə də ilk vaxtlar bir qədər çətin olacaq. Ancaq U-19-da yaxşı, istedadlı uşaqlar var. Onların xidmətindən yararlanmaq mümkündü. İlk növbədə maliyyə və şərait lazımdı ki, o da var. Gənclərin və təcrübəlilərin vəhdətindən döyüşkən komanda formalaşdırmaq mümkündü. Hər kollektivdə 5-6 gənc və bir o qədər də yaşlı, təcrübəli futzalçı olsa, kifayətdi. Böyük futbol deyil ki, 30 nəfərlik heyət yığasan. Futzalda 12 nəfər olsa, bəs edər. Sumqayıtda, Gəncədə yaxşı futzalçılar var.

RƏŞAD