Runi ''Siti'' ''Real''ı əzə-əzə keçəcək'' dedi, Kroos onun cavabını verdi
Yaxın keçmişin önəmli ulduzlarından olan Ueyn Runi bu gün baş tutacaq ''Real'' - ''Mançester Siti'' oyunu barədə maraqlı fikirlər səsləndirib.
“Football-plus.az” xəbər verir ki, hazırda ABŞ təmsilçisi ''DiSi Yunayted''i çalışdıran 38 yaşlı Runi eyni zamanda ''Tayms'' nəşrində analiz yazıları yazır. Onun iddiasına görə ''Siti'' Madrid nəhəngini elə-belə yox, əzə-əzə keçəcək: '
'Yarımfinalda ''Siti'' ''Real'' üzərində adi qələbə ilə kifayətlənməyəcək. Onlar madridliləri əzəcəklər! Düzdü, ''Real'' böyük təcrübəyə və tarixə malikdi. Bu faktı heç kim inkar edə bilməz. Amma məncə, bu mövsüm ''Siti''nin mövsümüdü. Qvardiolanın komandası bir il əvvəlkindən çox fərqlənir. Həm müdafiədə daha inamlı görünürlər, həm də heyətdə Holann kimi hücumçu var. Ötən mövsüm ''Bernabeu''da Holann olsaydı, nəticə fərqli olardı''.
Bu arada Runinin bu sözlərinə ''Real''ın almaniyalı yarımmüdafiəçisi Toni Kroosdan cavab gəlib:
''Hər il eyni şey eşidirik. Ötən mövsüm də pley-offun gedişində insanlar bizim haqda çox sözlər deyirdi. Heç kim bizim qalib olacağımızı gözləmirdi. Amma biz bunu bacardıq. Runinin nə deməsindən asılı olmayaraq onu bəyənirəm. Belə sözlər bizi əlavə olaraq motivasiyalandırmır. Çünki onsuz da maksimum dərəcədə motivasiyalıyıq''.
Digər xəbərlər
