“The Guardian” qəzetində Usmanovla bağlı maraqlı məlumat yayılıb. Sən demə, o, Böyük Britaniyaya gəlişi qadağan edildikdən sonra “Everton”a sponsorluq edib.

Mənbənin yazdığına görə, biznesmenə 2021-ci ilin sentyabrında şəxsən ölkənin daxili işlər naziri Priti Patel tərəfindən yasaq qoyulub. Nazirlik bunu Usmanovun Böyük Britaniyada mövcudluğunun “ölkənin xeyrinə olmaması” ilə izah edib.

Deyilənə görə, rusiyalıya qadağa tətbiq edilməsindən “Everton”un sahibi Fərhad Moşirinin xəbəri olub. Onda Usmanovun 26 yaşlı bacısı oğlu Sarvar İsmailov klubun direktorlar şürasının üzvü idi. Bundan başqa, “Everton”la “USM Holdings” arasında müqavilə də olub. Sazişə əsasən, biznesmenə məxsus şirkətlər qrupu komandanın rəqiblərini qəbul etdiyi stadionun ad hüququna malik idi. Bunlara baxmayaraq, Liverpul klubu Usmanovun “Everton”un idarəçiliyinə mümkün təsiri ilə bağlı iddianı rədd edirdi.

“The Guardian” isə milyarderin əslində klubun gizli həmsahibi olduğunu ehtimal edir. Buna sübut kimi, “Everton”da müxtəlif vəzifələrə təyinatlarla bağlı müzakirələrin onun iştirakı ilə keçməsi göstərilir. Lakin Moşiri bu iddianı təkzib edir. Başqa bir iddiaya inansaq, klub Baham adalarındakı offşor şirkətin sponsorluq etdiyi “Right & Media Funding Limited”in təşkilindən 150 milyon funt sterlinq alıb.

Onu da xatırladaq ki, “Everton” Usmanovun holdinqi ilə əlaqəyə yalnız ötən ilin martında iş adamına sanksiyalar tətbiq edildikdən sonra son qoyub.