“Futbol+” xəbərdar etdi, “Araz-Naxçıvan” rəhbərliyi hərəkətə keçdi
Ötən həftə Region Liqasında ikinci pley-off mərhələsinin ilk qarşılaşmaları baş tutdu.
Favoritlərin duelində “Qusar” "Füzuli"nin müqavimətini qıra bilmədi – 1:1. Gərgin mübarizəyə səhnə olan qarşılaşmadan sonra hər iki komandanın baş məşqçisinin fikirlərini öyrəndik. Qarabağ təmsilçisinin çalışdırıcısı Vasif İsmayılov “Futbol+”ə açıqlamasında önəmli faktın üstünü açdı. Sən demə, rəqibin heyətinə futzaldan Xətai Bağırovla Ramiz Çovdarov kimi tanınmış oyunçular cəlb olunub. Hər iki futzalçının “Araz-Naxçıvan”ın, Xətainin isə həm də milli komandanın üzvü olduğunu bilirik.
Görəsən, bu necə baş verib? Müqavilə ilə Muxtar Respublika təmsilçisinin heyətində çıxış edən futzalçıların Region Liqasında oynaması becə mümkün olub? Klub rəhbərliyinin bu faktdan xəbəri carmı? Suallarımızı “Araz-Naxçıvan”ın vitse-pezidenti Mahmud Sadıqova ünvanladıq. Sən demə, Mahmud bəyin məsələdən xəbəri yox imiş. O, başverənləri ilk dəfə bizdən eşitdiyini, hadisəni qısa zamanda araşdırıb tədbir görəcəyini və bu haqda məlumat verəcəyini bildirdi. Bir neçə saat sonra redaksiyamızla əlaqə saxlayan Mahmud bəy onu məsələdən agah etdiyimiz üçün təşəkkür edərək bunları dedi:
“Məşqdən öncə Xətai Bağırov və Ramiz Çovdarovla söhbət etdim. Sizdən aldığım məlumatın doğru olub-olmadığını soruşdum. Onlar hər şeyi mənə etiraf etdilər. Ötən həftə kluba verilən istirahəti fürsət bilərək belə səhvə yol veriblər. Hər ikisindən açıqlama tələb etdim. Lakin başlarını aşağı salaraq susdular. Ötən mövsüm bitəndən sonra onlar “Qusar”ın heyətində çıxış etmişdilər. Amma bizim razılığımız əsasında. İkisinin də transfer vərəqini özlərinə təqdim etmişdik və klubla futzalçılar arasında rəsmi müqavilə başa çatmışdı. Bu dəfə isə rəhbər şəxs kimi mənim razılığım, rəsmi qərarım olmayıb. Bu səbəbdən Xətai və Ramizi cəzalandırdım, biraylıq maaşdan məhrum etdim. Çox güman, mövsüm bitəndən sonra onların klubla müqaviləsinə xitam verəcəm. Hazırkı qərarım budu”.
Məsələ ilə bağlı “Qusar”ın oynayan-məşqçisi Tural Cəlilovun da fikirlərini öyrəndik. Onun açıqlamsı belə oldu:
“Adı çəkilən futzalçıların komandamızda çıxış etməsini qanunsuzluq saymıram. Yəqin ki, rəhbərlik bu haqda “Araz-Naxçıvan” rəsmiləriylə əlaqə saxlayaraq razılıq alıb. Ramiz Çovdarov daha öncə də komandamda çıxış edib”.
Belə halların qanunla necə tənzimləndiyini isə Region Liqası üzrə İşçi Qrupun üzvü, AFFA-nın Uşaq və Gənclər üzrə Yarışların Təşkili Departamentinin rəhbəri Yusif Vəliyevdən soruşduq:
“Region Liqasının qanunlarına görə, futzalçıların çıxış etməsində maneə yoxdu. Bunun üçün onların rəsmi müqavilə ilə məxsus olduğu klubların razılığı da vacib deyil. Həm Xətai Bağırovun, həm də Ramiz Çovdarovun lisenziyası var. Məsələn, onlar birinci divizion və ya premyer-liqa klublarının şərəfini qorusaydılar, Region Liqası oyunlarında iştirak etmələri qanunsuz olardı. Futzal və futbol isə fərqli sahələrdi”.
KƏNAN BAHADIR
Digər xəbərlər
