AFFA İcraiyyə Komitəsinin üzvü, Azərbaycan futboluna bir qara qəpiklik xeyri olmasa da, illərdi səfa çəkən Kazbek Tuayev yenə də dilə gəlib.
Ağsaqqal bu dəfə deyib ki, bizim futbolumuzu tənqid edənlər, onun inkişafını görməyənlər “Neftçi” – “Turan Tovuz” qarşılaşmasına baxsın. Guya ki, bu oyunun dramatik keçməsi, “Neftçi”nin bölgə təmsilçisinin qapısına 90-cı dəqiqədən sonra yol tapmağı bacarması inkişaf göstəricisi imiş. Halal olsun, Kazbek kişi. Biz qara fikirlilər sizin kimi pozitiv olub, Azərbaycan futbolunun necə inkişaf etdiyini, güllü-gülüstan içində olduğunu görə bilmirik. Allah gözümüzü açsın, sizə də ömür versin. Yenə bizim pulumuzu yeyib, Rusiyanı tərifləyin, onların futbolu haqda da mədhiyələr qoşun.
Amma hər bi işdə bir “əmma” olduğu kimi, burda da var. Cənab Tuayevin dediyi inkişafı, AFFA-nın uğurlu daxili və xarici siyasəti sayəsində yetişən futbolçuları görməyən təkcə biz deyilmişik. Elə Tuayevin də ikiəlli dəstəklədiyi millimizin italiyalı baş məşqçisi Canni de Byazi də həmin inkişafı görmür. Özü də bunu gizlətmir, AFFA-nı, o cümlədən də elə Kazbek Əliyeviçin özünü də fakt qarşısında qoyur. Bunu özümdən uydurmuram. İtaliyalı mütəxəssis “Səbail” – “Qəbələ” görüşünün gedişində gözlərini yumub, ağzını açıb. Ürəyini “azərisport”a boşaldıb. Yaxşı ki, ürəyində çox söz saxlamayıb. Yoxsa ahıl yaşında o kövrək ürəyinə ağır yük düşərdi, ürəyi də bu gərginliyə dözməz, onu yarıyolda qoyardı. Belə olan halda Azərbaycan millisi də başsız qalardı. Şükürlər olsun tanrıya, De Byazi ürəyini boşaltmağa tribuna tapıb.
Onun müsahibəsindən bir neçə məqama diqqət yetirək. Sitat: “Gəlin klublardan legionerləri çıxaraq, görək hansı avrokuboklarda uğur qazana biləcək? Biz Avstriya və İsveç futbolu ilə müqayisə oluna bilmərik. Onların futbolçuları böyük klublarda oynayır, Azərbaycan millisinin isə cəmi 3 legioneri var”. De Byazinin müsahibəsi başdan-ayağa belə fikirlər və iddialarla zəngindi, hamısını bir-bir bura yazmaq istəmirəm. Ümumi icmalı belədi. İtalyan mütəxəssisin bütün bu fikirləri AFFA-nı yalançı, Kazbek Tuayev və onun kimi digər malakeşlərin paxırını üzə çıxarır. Burası öz yerində. Qoy bir-birini qırsınlar, paxırlarını açsınlar. Millimizin baş məşqçisi faktiki deyir ki, Azərbaycanda futbolçu yoxdu, yetişməyib, AFFA bu illər ərzində milyonları göyə sovurub. Maraqlıdı ki, ilk vaxtlar Azərbaycanda böyük uğurlara imza atacağını deyən, Albaniyadakı işlərini xatırladan mütəxəssis indi bizim futbol məktəblərinin bərbad olduğunu, bu istiqamətdə çox danışılsa da, konkret AFFA-nın hansısa addım atmadığını deyir. Bütün bu ittihamlar ondan xəbər verir ki, De Byazinin AFFA İcraiyyə Komitəsinin son iclasında üzvləri şantaj etməsi, vəzifəsindən qovulacağı halda təzminatını son qəpiyinə qədər alacağını deməsi barədə yazılanlar həqiqətdi. Kim bilir, AFFA onun xətrinə dəysə, De Byazi daha nələr deyəcək...
Bütün bunlar öz yerində. Amma futboldan az-çox baş çıxaran, ədalət hissini itirməyən istənilən şəxs cəsarətlə deyə bilər ki, De Byazi də yalan danışır. “Qarabağ”ın avrokuboklarda keçirdiyi oyunlara diqqət etmək yetərlidi. Qurban Qurbanov start heyətində azı 5-6 yerli, yaxud “milliləşdirilən” futbolçuya güvənir. Hansı ki, həmin futbolçular sonra da millinin düşərgəsində elə De Byazinin sərəncamında olur. Sən Avropanın yaşıl meydanlarında tarix yazan Maksim Medvedevi, Qara Qarayevi bəyənmirsənsə, ona biz nə edək, ay De Byazi? Afinada yunanları susduran Ramil Şeydayevi millidə lazımınca oynada bilmirsənsə, kimin günahıdı? Milli çempionatın ən məhsuldar hücumçusu Musa Qurbanlıya yetərincə şans tanımırsansa, Azərbaycan futboluna hansı xidmətdən danışırsan? Millətlər Liqasında bizim də yer aldığımız qrupdan çıxan Qazaxıstan Avropa çempionatının seçmə oyunlarına əla başlayıb. Xəzərin o tayındakı qardaşlarımız yüksək əzmkarlıq göstərib, Danimarka ilə oyunu 0:2-dən 3:2-ə çevirməyi bacarıb. Bəlkə biz bilmirik, Maqomed Adıyevin əlinin altındakı futbolçular Avropanın top-klublarında oynayır?!
De Byazinin uydurmaların arxasına sığındığı, yalanlarla AFFA-nı şantaj etdiyi göz qabağındadı. Atalar demişkən, daş qayaya rast gəlib. Görək kim daha çox yalan danışmağı bacaracaq, maraqla izləyirik.
AMAL