"Naxçıvan Muxtar Respublikasında futbolun inkişafını istəyiriksə, təmsilçilərimizin aşağı yaş qrupları üzrə komandalarının da burda çıxış etməsinə nail olmalıyıq. Hazırda bizdə 10 yaşdan başlayaraq 16 yaşlı uşaqların yer aldığı komandaların çempionatı davam etməkdədi. U-13 və U-14 liqaları bir dövrədən ibarət olduğundan yekunlaşıb. Hazırda onlar Bakıda pley-off oyunlarına hazırlaşır. U-15 liqamız 3 dövrədən ibarətdi, hazırda 2-ci dövrə gedir. U-10 və U-11 liqasında nəticələr nəzərə alınmır. Onlar hazırda öz aralarında oyunlar keçirir. Mayın 6-7-də onların yeni çempionatı start götürəcək. Odu ki, U-10-dan U-16-ya qədər olan yaş qruplarının çempionatı birmənalı şəkildə Muxtar Respublikada olacaq.

U-17, U-19 və əvəzedici komandaya gəlincə, onların da çempionatını burda təşkil etməyə çalışırıq. 2023/24 mövsümündə adı çəkilən komandalarımız Bakıda yarışlara qoşulsa, mütləqdi ki, 2024/25-də ən azı U-17-lərin turnirini Naxçıvanda keçirək. Bununla da hər il Bakıda olan təmsilçilərimizin sayını azaltmaqla bütün yaş qrupları üzrə komandalarımızın çempionatını Muxtar Respublikada təşkil edəcəyik".

"Hazırda hamılıqla "Araz Naxçıvan"ın 1-ci divizinda çempion olmasını gözləyirik. Azər Bağırovun komandası 3 oyunda qalib gəlsə, çempionluğu rəsmləşdirəcək. Ondan sonra da rəsmi qurumların elitada oynamaqla bağlı qərarını gözləyəcəyik. Stadionda da yenidənqurma işləri aparılır. Ot örtüyü ilə bağlı bir neçə şirkətlə danışıq olub. Hətta ortaq məxrəcə gəldiyimiz də var. Sadəcə, bəzi nüanslar qalıb ki, onların dəqiqləşməsini gözləyirik".