Xavyer Masçerano fikrini dəyişib.

"Football-plus.az" xəbər verir ki, Argentinanın gənclərdən ibarət komandasına qarşıdakı dünya çempionatında o başçılıq edəcək.

38 yaşlı mütəxəssis U-20 yığmasının Cənubi Amerika çempionatındakı uğursuzluğuna görə istefaya yollanmışdı. Komandanın mübarizəni qrupda dayandırması Masçeranonu belə addım atmağa vadar etmişdi. Lakin Argentina Futbol Assosiasiyasının rəhbərliyi onu fikrindən daşındıra bilib.

Yığmanın sabiq yarımmüdafiəçisi gənclər millisini 2022-ci ildən çalışdırır. Komanda onun rəhbərliyi altında keçirdiyi 16 oyunda 9 qələbə qazanıb və 6 dəfə uduzub. Deyilənə görə, Masçeranonun fikrini dəyişməsinə həm də mundialın təşkilatçılıq hüququnun onun ölkəsinə verilməsi səbəb olub.