Böyük Britaniya və ABŞ-ın boks qurumları rusiyalı Umar Kremlyovun prezidenti olduğu Beynəlxalq Boks Assosiasiyasından çıxaraq “World Boxing” adlı yeni təşkilat yaratmağa hazırlaşır.

"Football-plus.az" xəbər verir ki, bu barədə “Inside the Games” portalı federasiyaların bəyanatına istinadla məlumat yayıb.

Mənbənin sözlərinə görə, ABŞ və Böyük Britaniyadan olan federasiyalara Avropa ölkələrindən daha bir neçə təşkilat qoşulacaq. Beynəlxalq Boks Assosiasiyasından çıxmaq barədə qərar onlayn brifinqdən sonra elan ediləcək. İki federasiyanın yaydığı bəyanatda belə deyilir:

“Dörd boks lideri olimpiya hərəkatının mərkəzində daimi yer tutmaq və idman üçün daha yaxşı gələcək təmin etmək məqsədi daşıyan bu ümumdünya tədbiri ilə bağlı sualları cavablamaq üçün hazır olacaq”.

Xüsusi vurğulayaq ki, rusiyalı Kremlyov bütün dünyanı bürüyən antirus hərəkatını vecinə almır və rəhbərlik etdiyi qurumu öz məqsədlərinə tabe etdirib.