Türkiyədə o qədər də tanınmış qapıçılardan sayılmayan Haydar Yılmaz son günlərdə yeli mətbuatda və sosial şəbəkələrdə müzakirə mövzusuna çevrilib.
"Football-plus.az" xəbər verir ki, karyerası boyunca əsasən aşağı liqalarda top qovan 39 yaşlı qapıçı Türkiyə futbolunu yaxından izləyənlərə yalnız “Alanyaspor”dakı çıxışı ilə tanış gələ bilər. Yılmaz 2016-19-cu illərdə superliqada bu klubun qapıçısı olub. O hazırda 2-ci liqada, yəni 3-cü divizionda çıxış edən “Vanspor”un şərəfini qoruyur. Xəbər isə ondan ibarətdi ki, guya Haydar Yılmaz Şenol Günəşin 40 ildən çoxdu davam edən rekordunu yeniləyib. Türkiyə futbolunda peşəkar liqalarda ən uzun müddət qol buraxmamaq rekordu Günəşə məxsusdu. Əfsanəvi qapıçı 1978/79 mövsümünün gedişində “Trabzonspor”un heyətində superliqada üst-üstə 12 oyunda, ümumilikdə 1112 dəqiqə qol buraxmamışdı. “Vanspor”un son matçının ardından bu mövzu yenidən aktuallaşdı və Haydar Yılmazın 1113-cü dəqiqədə qol buraxaraq Günəşə məxsus rekordu 1 dəqiqə də olsa, yenilədiyi iddia edildi. Amma məsələni araşdırdıqda ortaya tam fərqli mənzərə çıxır. Təcrübəli qapıçının bu seriyası 18-ci turda “Uşakspor”a qarşı oyunun 68-ci dəqiqəsində buraxdığı qoldan sonra başladı. Ardından 11 qarşılaşmada qapısından top buraxmayan Haydar Yılmazın seriyası 31-ci turda “Ankara Dəmirspor”la səfər oyununun 9-cu dəqiqəsində qırıldı. Belə seriyalarda və göstəricilərdə, adətən, oyuunlara əlavə olunmuş dəqiqələr nəzərə alınmır. Ardıcıl 11 oyun 990 dəqiqə deməkdi. “Uşakspor”la matçın 22 dəqiqəsi və “Ankara Dəmirspor”la oyunun ilk 8 dəqiqəsi də əlavə olunanda 1020 dəqiqə edir. Düzdü, “quru” seriya TFF-nin rəsmi sənədlərində 11 yox, 12 oyun kimi qeydə alınıb. Çünki zəlzələdən sonra liqadan çəkilən “Diyarbəkirspor”la oyuna görə də “Vanspor”a 3:0 hesablı texniki qələbə verilib. Amma lap tutaq ki, həmin 90 dəqiqəni də əlavə etsək, 1110 dəqiqə edir. Yəni Şenol Günəşə aid 1112 dəqiqəlik rekord heç bir halda yenilənmir! Türkiyə mətbuatının 1113 dəqiqəni hardan götürdüyü və bunu necə hesabladığı bilinmir. Məsələnin digər tərəfi isə odu ki, Günəş bu göstəriciyə 3-cü divizionda yox, rəqabətin daha böyük olduğu superliqada nail olub.