“Vitali Daraseliyanın turnirinə qatılmışıq. Yarışın başlamasına 10 gün qalmış dəvət olunduğumuza görə bəzi problemlər yaşadıq. Bizə 2007 təvəllüdlülərin yarışı olduğu deyilmişdi. Sonradan isə 2006 təvəllüdlü 8 nəfərin də iştirak ərizəsinə salınacağı deyildi. Bu üzdən problemlə üzləşdik. Yarışda “Qarabağ”dan başqa 5 komanda iştirak edir: Tiflis “Dinamo”su, “Montsa”, “Sevilya”, “İstanbul BŞ” və “Udineze”. İlk oyunda ciddi çətinliklə üzləşdik. Rəqibin heyətində yer alanların əksəriyyəti Gürcüstanın U-17 millisinin üzvüdü. Bu üzdən yaş amili özünü göstərdi. Uşaqlarda buna görə həyəcan da var idi. Biz 15-16 yaşlı uşaqları aparsaq da, onların heyətində 16-17 yaşlılar çoxluq təşkil edirdi. Həmçinin futbolçularımızın bir çoxu ilk dəfə ölkə xaricinə səfər edir. İkinci qarşılaşma nisbətən normal alındı. Yenə uduzsaq da, artıq irəliləyiş hiss olunurdu. Qəbul etməliyik ki, Azərbaycanla İtaliyanın uşaq futbolu eyni səviyyədə deyil. Rəqib komandanın futbolçuları daha üstün performans sərgiləyirdi. Üçüncü matç da ikinciyə nisbətən yaxşı idi. U-16-nın ab-havaya uyğunlaşdığını, mübarizə əzminin və inamının artdığını müşahidə etdim. Ümumiyyətlə, bu oyunlarda nəticəyə köklənməmişdik. Futbolçular bütün görüşlərdə özlərindən 1-2 yaş böyük rəqiblərlə qarşılaşdı. Həmçinin ardıcıl 3 gün meydana çıxdılar. Əsas məqsədimiz onlara təcrübə qazandırmaq idi. Bunu da bacardıq. İstərdim ki, Azərbaycandakı bütün komandaların aşağı yaş qrupları 3-4 aydan bir belə turnirlərə qatılsın. Bu, futbolumuzun inkişafı üçün vacibdi. Hazırda önəmli olan təmsilçilərimizin yüksək səviyyəyə çatmasıdı. Sabah dincəlirik. Birisigün isə “İstanbul BŞ” ilə sonuncu oyuna çıxacağıq”.