Gəncədə əsl futbol ab-havası hökm sürürdü. Potokolda matçı izləyənlərin sayının 500 nəfər olduğu göstərilsə də, tribunalarda 1000-ə yaxın azarkeş var idi.

Şuaybunun yoxluğunda “Kəpəz”in hücum xəttində boşluqluqların yaranacağını düşünsək də, oyun başlayan kimi gəncəlilər hücumları sıraladı. Martins, Mate, Fərid və Nicat qonaqlara problem yaradırdı. “Kəpəz”in yeganə çətinliyi müdafiə xətti ilə bağlı idi. Gəncəlilər sürətli Keyta, Rüstəm, texnikalı Rəhim, boşluqlar axtaran Qomes qarşısında çətin anlar yaşayırdı. Amma yarımmüdafiə və hücum xətti ilk hissədə çox yaxşı oyun nümayiş etdirirdi. Bu da fasiləyə kimi hesabın açılmasına səbəb oldu. Fərid baxımlı hücumu qolla tamamladı.

Rəşad Sadıqov 2-ci hissəyə üç dəyişikliklə başladı. Ümumiyyətlə, “Zirə”nin 7 legionerlə yaxşı oyun sərgiləyə bilməməsi anlaşılan deyildi. Hər halda, baş məşqçinin ideyaları işə yaradı. 80 dəqiqə baxımlı oyun nümayiş etdirən “Kəpəz”in futbolçularının sonda yorğunluğu hiss olunurdu. Və müdafiədəki ani bir səhv penalti ilə nəticələndi. Hərçənd Rəhimin təmas nəticəsində, yoxsa zərbə anında ayağı boşa çıxdığına görə yıxıldığını müəyyənləşdirmək çətin idi. Hər halda, topun arxasına keçən Keyta komandasının Gəncədən 1 xalla dönməsinə səbəbkar oldu. Beləliklə, “Zirə” ardıcıl iki turdu autsayderlə oyunda büdrəyir. “Kəpəz” isə evdə bütün komandalardan xal ala biləcəyini göstərdi.

Gözdən qaçmadı

* Oyunu PFL-in prezidenti Elxan Səmədov, FİF-in icraçı direktoru Tural Piriyev, yığmanın baş məşqçisi Canni de Byazi, Gəncə şəhər İcra Hakimiyyətinin rəsmiləri də canlı izləyirdi.
* 70-ci dəqiqədə top “Zirə”nin futbolçusundan çıxsa da, yan xətt hakimi əks istiqaməti göstərdi. Bu da həm gəncəli futbolçuları, həm də Tərlan Əhmədovu əsəbləşdirdi. Mütəxəssis əliylə göyü göstərib “Allahınız olsun” deməklə hirsini soyutdu.
* 80-ci dəqiqədə Rəşad Sadıqovla Qismət Alıyev arasında söz atışması baş verdi. Kapitanın iradı qəbul etməməsi məşqçini əsəbləşdirdi. O, futbolçuya barmaq silkələdi.