"Səbail" - "Sumqayıt" qarşılaşmasının 63-cü dəqiqəsində meydan sahiblərinin futbolçusu Qustavo de Fransa Vüsal İsgəndərlinin qarşısını kobudluqla aldığı üçün birbaşa “qırmızı” ilə qovuldu.

Ümumiyyətlə, "Səbail" cari mövsüm qırmızı vərəqələrin sayına görə liderlərdəndi. Elə Qustavo da kobudluğa meyilli futbolçulardan sayılır. Bunu araşdırmamız da üzə çıxardı.

Geridə qalan 25 turda braziliyalı müdafiəçi 20 oyunda meydanda olub. 9 sarı, 2 qırmızı vərəqə almaqla yanaşı, 1 avtoqol müəllifi olub. "Sambaçı" artıq 6-cı turda 4 sarı vərəqə limitini aşıb. 8-ci turda 2 “sarı” almaqla meydandan qovulub. "Səbail"in heyətində Tural Bayramlı 2 dəfə qırmızı aldığına görə komandada uzaqlaşdırıldığı və hazırda da əvəzedicilərdə çıxış etdiyi halda, 3 dəfə cəzalı duruma düşən, 1 avtoqol müəllifi olan Qustavo nə üçün cəzalandırılmır və ya "Səbail-2"yə göndərilmir?! Braziliyalı müdafiəçi nə yaradıcı, nə dağıdıcı, nə də intizamlı oyunu ilə diqqəti çəkir. Onun meydanda olduğu matçların əksəriyyətində komanda uğursuz çıxış edib, yenilgilərlə üzləşib. İstər Mahmud Qurbanovun, istərsə də, Şahin Diniyevin braziliyalıya bu qədər tolerant münasibət bəsləməsinin səbəbi həqiqətən maraqlıdı.

ABDULLA İSMAYILOĞLU