Biabırçılıq: “CBC Sport” ÇL-i üstün tutub, “İdman TV” yaxın durmayıb - AÇIQLAMA
Futzal millimiz bu gün DÇ-2024-ün əsas mərhələsində sonuncu oyununu keçiriləcək. Jose Alesio Da Silvanın baş məşqçisi olduğu komanda Polşanın qonağı olacaq.
Vacib qarşılaşmadan öncə yığmanın düşərgəsindəki ab-havanı öyrənmək üçün Futzal Federasiyasının mətbuat xidmətinin rəhbəri Mahal Məmmədovla əlaqə saxladıq. Onun “Football-plus.az”a söylədikləri belə oldu:
“Vəziyyət yaxşıdı. Dünən oyunöncəsi son məşqlər keçirildi. Daha sonra komanda istirahətə çəkildi. Tyaqo Bolinya, Fineo və Eduardo Borgesin qızdırması var. Onlar oyunda həkimlərin nəzarəti ilə çıxış edəcəklər. Ümumilikdə ab-hava qaydasındadı. Amma azarkeşlərlə bağlı problem var. Qarşılaşmanın keçiriləcəyi stadion paytaxtdan çox uzaqdadı və oyun vaxtı dərs vaxtı ilə “toqquşur”. Tələbə tərəfdarlarımızın oyuna gəlməsi sual altındadı. Bununla bağlı Polşadakı azərbaycanlılara müraciət etmişik. İnanırıq ki, stadionda bizimlə olacaqlar”.
Mahal bəy qarşılaşmanın canlı yayını ilə bağlı sualımızı da cavablandırdı:
“Millimizin oyunlarını yayınlayan əsas telekanal “CBC Sport”du. Bugünkü qarşılaşma Çempionlar Liqasının görüşləri ilə üst-üstə düşdü. Telekanal xarici futbolu yayınlamağı üstün tutdu. İstəyərdik ki, bu gün efirdə millimizin oyunu göstərilsin. “İdman TV”yə də müraciət etmişdik. Təəssüf ki, bu təşəbbüsümüz də qəbul edilmədi. Eybi yoxdu, əsas odu ki, komandamız qarşıya qoyulan məqsədə nail olsun, qrup birincisi kimi ölkəyə qayıtsın”.
KƏNAN BAHADIR
Digər xəbərlər
