19 yaşadək futbolçulardan ibarət yığma Antalya toplanışını başa vuraraq vətənə dönüb. 10 gün ərzində Türkiyədə üç yoldaşlıq matçı keçirən yığma Tacikistanın U-20 komandasına uduzdu (1:2), Səudiyyə Ərəbistanı ilə iki dəfə heç-heçə (2:2 1:1) etdi.

Əlaqə saxladığımız U-19-un baş məşqçisi Aqil Nəbiyev də razı qalmayıb:

“Vətənə qələbə ilə dönməsək də, təhlil üçün şərait yarandı. Komandanın çatışmayan cəhətlərini gördüm. Yığma bu formada oyunlara hazır deyil. Yorğunluq inkişafa və məqsədə uzanan yolun önünü kəsir. Fiziki hazırlıqla bağlı problemlər var. Bəzi hərəkətləri düzgün yerinə yetirmirlər. Həm pandemiya dönəmi, həm də son aylarda geniş yayılan viruslar gənclərə mane olur. Təəssüf ki, vaxtımız azdı. Bu dönəmdə uşaqlara, sadəcə, taktiki məşqlər keçə bilirik. Fiziki hazırlığı qaydaya salmağa vaxt olmur. Futbolçular U-19 liqasında da çıxış edir. Antalya toplanışındakı süstlüyün səbəblərindən biri də budu. Üç qarşılaşmaya hazırlaşmaq üçün cəmi 4 məşq edə bilmişdik. Yorğun olsaq da, bütün oyunlarda topa daha çox sahib olduq, qol vəziyyətləri yaratdıq. Əsas heyətin 4 üzvü, təəssüf ki, bu oyunlarda iştirak edə bilmədi. Çünki klubları müəyyən səbəblərdən onları buraxmadı. Qeyd etdiyim çətinliklərə baxmayaraq, potensiallı, gələcək vəd edən oyunçular var. Buna son matçlarda da şahidlik etdim. Onların daha güclü komandaların heyətində oynamaları vacibdi. Çünki yaxşı futbolçu olmaq üçün təzyiq altında olmalısan, daha güclülərlə “döyüşməlisən”. İnanıram ki, həmin uşaqlara şərait yaradılsa, uğur qazanacaqlar. Gənc futbolçulara üstünlük vermək lazımdı”.

Mütəxəssis rəqiblər haqda da danışdı:

“Həm fiziki, həm də fərdi keyfiyyətlərinə görə yüksək səviyyədə idilər. Çox maraqlı oyun sərgilədilər. Meydana çıxana qədər 5 dəfə məşq etmişdilər. 2005 təvəllüdlü futbolçularımızın meydanı təcrübəli fiqurlarla bölüşməsi bizim üçün hər cəhətdən qazanclı oldu. Ümumilikdə onu deyə bilərəm ki, Antalya toplanışı yığmaya böyük təcrübə qazandırdı. Hazırlıq mərhələsi olduğuna görə nəticələrə önəm vermirəm. Əksinə, güclü komandaların mübarizəsi futbolçuların inkişafı üçün daha effektlidi. Növbəti toplanışda da iştirak edəcəyik”.

KƏNAN BAHADIR