Təcrübəli ingiltərəli hakim Li Meyson son təzyiqlərin və tənqidlərin ardından karyerasını bitirmək qərarına gəlib.

Meyson premyer-liqanın 23-cü turu çərçivəsində keçirilən ''Arsenal'' – ''Brentford'' matçında (1:1) VAR hakimi qismində çalışırdı. 74-cü dəqiqədə qonaqların hesabı bərabərləşdirdiyi epizodda Meyson nədənsə, yalnız qayda pozuntusunun olub-olmamasını yoxlamaq qərarına gəlmişdi. Ofsayd xəttini çəkməyi isə unutmuşdu. Halbuki ötürmə anında Kristian Nyörqorun oyundankənar vəziyyətdə olduğu görünürdü. Hücumun davamında məhz Nyörqorun ötürməsindən sonra Ayven Toni hesabı bərabərləşdirmiş və londonlular çempionluq yarısında çox mühüm 2 xal itirmişdilər. Bu epizod təbii ki, ''Arsenal'' cəbhəsində böyük narazılıq doğurmuşdu. İngiltərə Hakimlər Komitəsinin sədri Hovard Uebb hətta bu yanlışlığa görə şəxsən ''Arsenal''dan üzr istəməli olmuşdu. Bu kobud səhvin ardından 51 yaşlı Meyson belə desək, fitini mismardan asmaq qərarına gəlib. Hakimlik sahəsinə 1996-da gələn Meyson 2006-dan etibarən premyer-liqa matçlarına təyinat alırdı. 2021-dən bu yana isə o, yalnız VAR hakimi qismində çalışırdı. Karyerası ərzində o, 287-si premyer-liqada olmaqla 500-dən çox oyun idarə etmişdi.